മലപ്പുറം: സംസ്ഥാനത്ത് കൊവിഡ് ബാധിച്ച് ഇന്ന് ഒരാൾ കൂടി മരിച്ചു. പത്തനംതിട്ട മുണ്ടുകോട്ടയ്‌ക്കൽ ജോസഫ്(70) ആണ് മരണമടഞ്ഞത്. ഇതോടെ ഇന്ന് മരണമടഞ്ഞവരുടെ എണ്ണം രണ്ടായി. മഞ്ചേരി മെഡിക്കൽ കോളേജിൽ ചികിത്സയിലായിരുന്ന അട്ടപ്പാടി സ്വദേശിനി നിഷ(24) ആണ് രാവിലെ മരിച്ചത്.

സംസ്ഥാനത്ത് ഇന്നലെ നാല് മരണങ്ങളാണ് കൊവിഡ്19 മൂലമാണെന്ന് സ്ഥിരീകരിച്ചത്. ഓഗസ്റ്റ് 22ന് മരണമടഞ്ഞ എറണാകുളം രാജഗിരി സ്വദേശി എൻ.വി. ഫ്രാൻസിസ് (76), ഓഗസ്റ്റ് 23ന് മരണമടഞ്ഞ കാസർകോട് അരായി സ്വദേശി ജീവക്യൻ (64), ഓഗസ്റ്റ് 24ന് മരണമടഞ്ഞ കാസർഗോഡ് രാവണേശ്വരം സ്വദേശി കെ. രമേശൻ (45), ഓഗസ്റ്റ് 26ന് മരണമടഞ്ഞ തിരുവനന്തപുരം എല്ലുവിള സ്വദേശി സോമൻ (67) എന്നിവരാണ് കൊവിഡ് മൂലമാണ് മരണടഞ്ഞതെന്ന് സ്ഥിരീകരിച്ചത്. ഇതോടെ സംസ്ഥാനത്തെ ആകെ കൊവിഡ് മരണം 298 ആയി.

സംസ്ഥാനത്ത് ഇന്നലെ 1140 പേർക്കാണ് കൊവിഡ് സ്ഥിരീകരിച്ചത്. ഇതിൽ 1059 പേർക്ക് സമ്പർക്കത്തിലൂടെയാണ് രോഗം ബാധിച്ചത്.158 പേരുടെ സമ്പർക്ക ഉറവിടം വ്യക്തമല്ല. കഴിഞ്ഞദിവസം രോഗം സ്ഥിരീകരിച്ചവരിൽ 14 പേർ വിദേശ രാജ്യങ്ങളിൽ നിന്നും 36 പേർ മറ്റ് സംസ്ഥാനങ്ങളിൽ നിന്നും വന്നതാണ്.