ഡയറക്ട് ഒടിടി റിലീസ് ആയി തിരുവോണദിനത്തില്‍ പുറത്തിറങ്ങിയ 'മണിയറയിലെ അശോകൻ' നെറ്റ്ഫ്ലിക്സിൽ ട്രെന്റിംഗ്. ദുല്‍ഖര്‍ സല്‍മാന്റെ നിര്‍മ്മാണക്കമ്പനിയായ വേഫയറര്‍ ഫിലിംസാണ് നിർമ്മാണം. നെറ്റ്ഫ്ലിക്‌സിന്റെ ഇന്ത്യ ട്രെന്റിംഗ് ലിസ്റ്റില്‍ ചിത്രം രണ്ട് ദിവസങ്ങളായി ആദ്യ സ്ഥാനങ്ങളിലാണ്. അതിലുള്ള സന്തോഷം ദുല്‍ഖര്‍ സല്‍മാന്‍ ഫേസ്ബുക്കിലൂടെ പങ്കുവച്ചു.
ഇന്ത്യയ്‌ക്കൊപ്പം യു.എ.ഇയിലും ചിത്രം സിനിമകളുടെ ട്രെന്റിംഗ് ലിസ്റ്റില്‍ ഒന്നാമതെത്തിയ കാര്യവും ദുല്‍ഖര്‍ അറിയിച്ചു. സ്‌ക്രീന്‍ ഷോട്ടുകള്‍ പങ്കുവച്ചുകൊണ്ടാണ് ദുല്‍ഖര്‍ ഇക്കാര്യം അറിയിച്ചത്. ഒപ്പം ചില ഹാഷ്ടാഗുകളും ദുല്‍ഖര്‍ പോസ്റ്റിനൊപ്പം ചേര്‍ത്തിട്ടുണ്ട്.
'വെറുക്കുന്നവര്‍ക്ക് വെറുക്കാം' #haterscanhate എന്നതാണ് അതിലൊന്ന്. ജേക്കബ് ഗ്രിഗറിയും അനുപമ പരമേശ്വരനും പ്രധാന കഥാപാത്രങ്ങളെ അവതരിപ്പിച്ച ചിത്രത്തിന് മികച്ച അഭിപ്രായങ്ങള്‍ മാത്രമല്ല ലഭിച്ചത്. ഒരുവിഭാഗം പ്രേക്ഷകര്‍ ചിത്രം തങ്ങള്‍ക്ക് ഇഷ്ടമായെന്ന് അഭിപ്രായപ്പെട്ടപ്പോള്‍ മറ്റൊരു വിഭാഗം പടം പ്രതീക്ഷയ്‌ക്കൊത്ത് വന്നില്ലെന്നും പറഞ്ഞു.
സംവിധായകനുള്‍പ്പെടെ ഒട്ടേറെ നവാഗതര്‍ ഒരുമിച്ച ചിത്രമാണ് മണിയറയിലെ അശോകന്‍.ഛായാഗ്രാഹകന്‍ സജാദ് കാക്കു, രചയിതാക്കളായ വിനീത് കൃഷ്ണന്‍, മഗേഷ് ബോജി, സംഗീതസംവിധായകന്‍ ശ്രീഹരി കെ നായര്‍, സ്റ്റില്‍ ഫോട്ടോഗ്രാഫര്‍ ഷുഹൈബ് എന്നിവരുടെയും ആദ്യചിത്രമാണ് ഇത്. ഷൈന്‍ ടോം ചാക്കോ, കൃഷ്ണശങ്കര്‍, വിജയരാഘവന്‍, ഇന്ദ്രന്‍സ്, സുധീഷ്, ശ്രീലക്ഷ്മി, നയന, ശ്രീദ ശിവദാസ് എന്നിങ്ങനെ വലിയൊരു താരനിര തന്നെ ചിത്രത്തില്‍ അണിനിരക്കുന്നുണ്ട്.