ബ്രസൽസ് : കിഴക്കൻ ബെൽജിയത്തിലെ വെർവിയർസിലെ ഒരു അലങ്കാര ഫൗണ്ടൻ ഒരു നൂറ്റാണ്ടിലേറെയായി ഒരു വസ്തുവനെ നിധി പോലെ അതിനുള്ളിൽ സൂക്ഷിച്ചു വയ്ക്കുകയായിരുന്നു. കേൾക്കുമ്പോൾ അത്ഭുതം തോന്നാം, പക്ഷേ, സത്യമാണ്... ആ നഗരത്തിന്റെ ആദ്യത്തെ മേയറുടെ ഹൃദയമാണ് ഇത്രയും ദശാബ്ദങ്ങളായി ഫൗണ്ടന്റെ ഉള്ളിൽ സൂക്ഷിച്ചിരുന്നത്.

ഒരു സിങ്ക് പെട്ടിയ്ക്കുള്ളിൽ ആൽക്കഹോൾ നിറച്ച ജാറിനകത്താണ് മേയറുടെ ഹൃദയം സൂക്ഷിച്ചിരുന്നത്. ഫൗണ്ടൻ പുനഃരുദ്ധാരണം ചെയ്യുന്നതിന്റെ ഭാഗമായുള്ള അറ്റകുറ്റപ്പണികൾക്കിടെയിലാണ് ഹൃദയം സൂക്ഷിച്ചിരുന്ന പേടകം കണ്ടെത്തിയത്. നഗരത്തിലെ ഫൈൻ ആർട്സ് മ്യൂസിയത്തിലേക്ക് ഈ പേടകം മാറ്റിയിരിക്കുകയാണ്. 1839ലാണ് നഗരത്തിലെ ആദ്യ മേയറായിരുന്ന പിയറി ഡേവിഡ് 68ാം വയസിൽ അന്തരിച്ചത്. പിയറി ഡേവിഡിന്റെ മരണശേഷം അദ്ദേഹത്തെ ആദരിക്കാനാണ് അധികൃതർ ഫൗണ്ടൻ നിർമിച്ചത്. പിയറിയുടെ കുടുംബ ഡോക്ടർ ആണ് അദ്ദേഹത്തിന്റെ ഹൃദയം ശരീരത്തിൽ നിന്നും നീക്കം ചെയ്തത്.

എന്നാൽ ഈ ഫൗണ്ടൻ ഉദ്ഘാടനം ചെയ്യപ്പെട്ടത് 1883ലാണ്. മേയറുടെ പേരിൽ തന്നെയാണ് ഈ ഫൗണ്ടൻ അറിയപ്പെടുന്നതും. 1883 ജൂൺ 25നാണ് പിയറി ഡേവിഡിന്റെ ഹൃദയം ഈ സ്മാരക ഫൗണ്ടനിൽ സ്ഥാപിക്കപ്പെട്ടതെന്ന് ഹൃദയം സൂക്ഷിച്ചിരിക്കുന്ന പേടകത്തിന് മുകളിൽ രേഖപ്പെടുത്തിയിട്ടുണ്ട്. മേയറുടെ ഹൃദയം ഫൗണ്ടനുള്ളിലുണ്ടെന്ന് നാട്ടിൽ പറയപ്പെട്ടിരുന്നുവെങ്കിലും പലരും ഇത് വിശ്വസിക്കാൻ തയാറായിരുന്നില്ല. എന്നാൽ ഫൗണ്ടന് ഉള്ളിൽ നിന്നും ഹൃദയം ശരിക്കും കണ്ടെത്തിയതോടെ ഏവരും അക്ഷരാർത്ഥത്തിൽ ഞെട്ടി. പിയറി ഡേവിഡിന്റെ അർദ്ധകായ പ്രതിമയോട് ചേർന്ന് ഫൗണ്ടന്റെ മുകൾഭാഗത്തെ ഒരു പൊള്ളയായ കല്ലിന് പിറകിലായിരുന്നു പേടകം സൂക്ഷിച്ചിരുന്നത്. നവീകരണ പ്രവർത്തനങ്ങൾക്കിടെ ഈ കല്ല് നീക്കം ചെയ്തപ്പോഴാണ് ഹൃദയം സൂക്ഷിച്ചിരിക്കുന്ന പേടകം കണ്ടെത്തിയത്.