സ്റ്റോക്ക്‌​ഹോം: കൊവിഡ് ബാധിക്കുമെന്ന് ഭയന്ന് സ്വീഡനിൽ മാതാപിതാക്കൾ പൂട്ടിയിട്ട മൂന്ന് കുട്ടികളെ മോചിപ്പിച്ചു. പത്ത് മുതൽ 17 വയസ് വരെയുള്ള മൂന്ന് കുട്ടികളെയാണ് മാർച്ച് മുതൽ നാല് മാസത്തോളം അപ്പാർട്ട്‌​മെന്റിൽ മാതാപിതാക്കൾ അടച്ചിട്ടത്.

കുട്ടികളെ പരസ്പരം കാണാനും അനുവദിച്ചിരുന്നില്ല. ഓരോരുത്തരെയും അവരുടെ റൂമുകളിലാക്കി അവിടേക്ക് ഭക്ഷണം നൽകുകയായിരുന്നു പതിവെന്ന് തെക്കൻ സ്വീഡനിലെ ജോങ്കോപിംഗ് അഡ്മിനിസ്‌​ട്രേറ്റീവ് കോടതി പറഞ്ഞു. കൂടാതെ വീടിന്റെ വാതിലും അടച്ചിട്ടിരുന്നതിനാൽ ആർക്കും പുറത്തിറങ്ങാനും സാധിച്ചിരുന്നില്ല.

മറ്റു യുറോപ്യൻ രാജ്യങ്ങളിൽ നിന്ന് വ്യത്യസ്തമായ സ്വീഡൻ കടുത്ത ലോക്ക്ഡൗൺ നിയന്ത്രണങ്ങൾ ഏർപ്പെടുത്തിയിരുന്നില്ല. കൂടാതെ 16 വയസിന് താഴെയുള്ള കുട്ടികൾക്കായി സ്​കൂളുകൾ തുറന്ന് പ്രവർത്തിക്കുകയും ചെയ്തിരുന്നു.

ജനസംഖ്യയുമായി താരതമ്യപ്പെടുത്തുമ്പോൾ ലോകത്തിൽ ഏറ്റവും ഉയർന്ന കൊവിഡ് മരണ നിരക്കാണ് സ്വീഡനിൽ. ഓരോ പത്ത് ലക്ഷത്തിനും 575 കൊവിഡ് മരണമെന്ന അനുപാതത്തിലാണ് സ്വീഡനിൽ റിപ്പോർട്ട് ചെയ്യപ്പെടുന്നത്.