ന്യൂയോർക്ക്: പതിനഞ്ചാമത്തെ കുഞ്ഞിനെ പ്രസവിച്ച് മൂന്നു മാസം കഴിഞ്ഞതേയുള്ളൂ... 38കാരിയായ പാറ്റി ഫെർണാണ്ടസ് വീണ്ടും ഗർഭിണിയായി. പതിനാറാമത്തെ കുഞ്ഞിനെ താലോലിക്കാൻ കാത്തിരിക്കുകയാണ് പാറ്റിയുടെ ഭർത്താവ് കാർലോസ്(37). 'ദൈവത്തിന്റെ സമ്മാനമാണ് കുഞ്ഞുങ്ങൾ. ഒരിക്കലും വേണ്ടെന്ന് പറയില്ലെന്നാണ്' ദമ്പതികളുടെ തീരുമാനം.

നോർത്ത് കരോളീനയിലെ അഞ്ചു ബെഡ്‌റൂമുള്ള വീട്ടിലാണ് പാറ്റിയും കാർലോസും 15 മക്കളും കഴിയുന്നത്. ഒരു നേഴ്‌സറിയും അഞ്ചു തൊട്ടിലുകളുമുണ്ടിവിടെ.

അച്ഛനോടുള്ള സ്നേഹം കാരണം മക്കളുടെ പേരുകളെല്ലാം 'സി' യിലാണ് തുടങ്ങുന്നത്. മക്കളിൽ ആറു പേർ മൂന്നു തവണയായി പിറന്ന ഇരട്ടകളാണ്. 2008 ലായിരുന്നു ആദ്യ പ്രസവം. ഏറ്റവും ഇളയ കുഞ്ഞ് 2020 ഏപ്രിലിലാണ് പിറന്നത്.ഒരു പ്രസവം കഴിഞ്ഞ് അടുത്ത മൂന്നു മാസത്തിനുള്ളിൽ വീണ്ടും ഗർഭം ധരിക്കുമെന്ന് പാറ്റി പറയുന്നു. അടുത്ത കുഞ്ഞ് 2021 മേയിൽ പിറക്കും. കൂടുതൽ കുട്ടികളുണ്ടാവുന്നത് സന്തോഷമെന്നും ഇവർ പറയുന്നു.

മാസം 500 ഡോളർ ഡയപ്പർ വാങ്ങാനായി ചെലവഴിക്കുന്ന ദമ്പതികൾ, കുടുംബസമേതം പുറത്ത് പോകാൻ 16 സീറ്റുള്ള ബസ് വാങ്ങാനുള്ള ആലോചനയിലാണ്. ഒരാഴ്ചത്തേക്ക് ഭക്ഷണത്തിന് മാത്രമായി ഏകദേശം 37,000 രൂപ ചിലവ് വരും ഇവർക്ക്.

ഈശ്വരൻ തരുന്നതെന്തും കൈനീട്ടി സ്വീകരിക്കണമെന്ന് പാറ്റി വിശ്വസിക്കുന്നു. കുട്ടികൾക്ക് വീട്ടു ജോലിയും വീതിച്ചു നൽകാറുണ്ട്. മൂത്ത കുട്ടി സ്വന്തമായി പാൻകേക്ക് ഉണ്ടാക്കാറുണ്ട്. ഇളയ കുട്ടികൾ കളിപ്പാട്ടം നിലത്തു നിരത്തിയാൽ എല്ലാം അടുക്കിപെറുക്കേണ്ടത് മൂത്തകുട്ടികളുടെ ചുമതലയാണ്. ഈ വലിയ കുടുംബത്തെ പുറംലോകം അത്ഭുതത്തോടെയാണ് കാണുന്നത്.