ന്യൂയോർക്ക്​: തിരഞ്ഞെടുപ്പിൽ രണ്ടു തവണ വോ​ട്ട്​ ചെയ്യൂ എന്ന അമേരിക്കൻ പ്രസിഡന്റ് ഡൊണാൾഡ് ട്രംപിന്റെ പരാമർശം വിവാദമായി. നോർത്ത്​ കരോളിനയിലെ ഒരു വെബ്​സൈറ്റിന്​ നൽകിയ അഭിമുഖത്തിലാണ് മെയിലിലൂടെയും നേരിട്ട് പോളിംഗ് ബൂത്തിൽ എത്തിയും വോട്ട് രേഖപ്പെടുത്താൻ ട്രംപ് വോട്ടർമാരോട് ആവശ്യപ്പെട്ടത്.

സംഭവം വിവാദമായതോടെ ഇതുമായി ബന്ധപ്പെട്ട ട്രംപിന്റെ വീഡിയോയും പ്രസ്താവനയും ഫേസ്ബുക്കും ട്വിറ്ററും നീക്കം ചെയ്തു. വ്യാജ വോട്ട്​ തടയുകയെന്ന ഞങ്ങളുടെ പോളിസിയുടെ ഭാഗമായാണ്​ ട്രംപിന്റെ പ്രസ്​താവന നീക്കുന്നത്​.''- ഫേസ്​ബുക്ക്​ അധികൃതർ അറിയിച്ചു. ട്രംപിനെതിരെ ഡെമോക്രാറ്റിക് പാർട്ടിയും രംഗത്തെത്തിയിട്ടുണ്ട്.രണ്ട് തവണ വോട്ടുചെയ്യാനാവശ്യപ്പെടുന്ന ട്രംപിന്റെ വീഡിയോ വൈറലായി മാറിയിരുന്നു.

കൊവിഡ്​ മൂലം നോർത്ത്​ കരോളിനയിൽ അടക്കം ചില സംസ്​ഥാനങ്ങളിൽ മെയിലിലൂടെയാണ്​ വോട്ടെടുപ്പ് നടത്തുന്നത്.

'എന്നാൽ, വാർത്ത മാദ്ധ്യമങ്ങൾ വളച്ചൊടിച്ചതാണെന്ന്​ വൈറ്റ്​ഹൗസ്​ വൃത്തങ്ങൾ അറിയിച്ചു. മെയിലിലൂടെയുള്ള വോട്ട് രേഖപ്പെടുത്തിയെന്ന് ഉറപ്പുവരുത്താനും അതിന് കഴിഞ്ഞിട്ടില്ലെങ്കിൽ നേരിട്ടെത്തി വോട്ട് ചെയ്യാനുമാണ് പ്രസിഡന്റ് നിർദ്ദേശിച്ചതെന്നും രണ്ട് തവണ വോട്ടു ചെയ്യണമെന്ന് അദ്ദേഹം ആവശ്യപ്പെട്ടിട്ടില്ലെന്നും വൈറ്റ് ഹൗസ് പ്രതികരിച്ചു.