ടെൽ അവിവ് : ആകാശത്ത് നിന്നും കഞ്ചാവ് പായ്ക്കറ്റുകൾ മഴ പോലെ പെയ്തിറങ്ങുന്നത് കണ്ട് അത്ഭുതപ്പെട്ട് ജനം. ഇസ്രയേലിലെ ടെൽ അവിവിലാണ് സംഭവം. ആകാശത്ത് നിന്നും കഞ്ചാവ് പായ്ക്കറ്റുകൾ കൂട്ടത്തോടെ വീണതോടെ അവ കൈക്കലാക്കാൻ ആളുകൾ തമ്മിൽ പിടിവലി പോലുമായി. ദ ഗ്രീൻ ഡ്രോൺ ഗ്രൂപ്പ് എന്ന സംഘമാണ് ടെൽ അവിവ് നഗരത്തിലെ തെരുവുകളിലേക്ക് ആകാശത്ത് നിന്നും ഡ്രോൺ വഴി നൂറുകണക്കിന് കഞ്ചാവ് പായ്ക്കറ്റുകൾ ' സൗജന്യമായി ' താഴേക്കിട്ടത്.

കഞ്ചാവിന്റെ ഉപയോഗം നിയമാനുസൃതമാക്കണമെന്ന് വാദിക്കുന്ന ആക്ടിവിസ്റ്റുകളാണ് ഇവ‌ർ. ആകാശത്ത് നിന്നും അജ്ഞാത വസ്തു പതിക്കുന്നത് കണ്ട് ആദ്യമൊന്ന് ഞെട്ടിയെങ്കിലും കാര്യം പിടികിട്ടിയതോടെ പൊലീസ് എത്തുന്നതിന് മുമ്പ് കിട്ടാവുന്നത്ര പായ്ക്കറ്റുകൾ കൈക്കലാക്കി പലരും സ്ഥലം കാലിയാക്കുകയായിരുന്നു. കഞ്ചാവ് വർഷിക്കുന്നതിനു മുമ്പ് തങ്ങളുടെ അനുകൂലികൾക്ക് ഗ്രീൻ ഡ്രോൺ അംഗങ്ങൾ ഇക്കാര്യത്തെ പറ്റി ടെലിഗ്രാമിലൂടെ സൂചന നൽകിയിരുന്നു.

ഇത്തരത്തിൽ ഡ്രോൺ വഴി പലയിടത്തേക്കും ഇനി കഞ്ചാവ് വിതരണം നടത്താൻ സംഘത്തിന് പദ്ധതിയുണ്ടെന്നാണ് റിപ്പോർട്ട്. ഒരു കിലോ കഞ്ചാവ് 2 ഗ്രാം വീതം പായ്ക്കറ്റുകളിലാക്കി ആഴ്ചയിലൊരിക്കൽ രാജ്യത്തിന്റെ വിവിധ ഭാഗങ്ങളിൽ ഡ്രോൺ വഴി വിതരണം ചെയ്യാനാണ് സംഘം ലക്ഷ്യമിട്ടത്. ' റെയ്‌ൻ ഒഫ് കാനബിസ് ' എന്നാണ് തങ്ങളുടെ പുതിയ പ്രോജക്ടിന് ഗ്രീൻ ഡ്രോൺ സംഘം നൽകിയിരിക്കുന്ന പേര്. പൊലീസ് നടത്തിയ അന്വേഷണത്തിലാണ് കഞ്ചാവ് സംഘത്തിന്റെ ടെലിഗ്രാം സന്ദേശങ്ങൾ കണ്ടെത്തിയത്. സംഭവത്തിൽ രണ്ട് പേരെ പൊലീസ് അറസ്റ്റ് ചെയ്തു.