ഓസ്റ്റിൻ : ഹാൻഡ് സാനിറ്റൈസറിൽ തീ പടർന്ന് യുവതിയ്ക്ക് ഗുരുതരമായി പൊള്ളലേറ്റു. യു.എസിലെ ടെക്സസിൽ കഴിഞ്ഞ ദിവസമാണ് സംഭവം. മെഴുകുതിരി കത്തിക്കുന്നതിനിടെ തന്റെ ത്വക്കിൽ പുരട്ടിയിരുന്ന ഹാൻഡ് സാനിറ്റൈസർ തീപിടിച്ച് ആളിക്കത്തുകയായിരുന്നു എന്നാണ് യുവതിയുടെ മൊഴി. കൈയുടെ എല്ലാ ഭാഗത്തും ഹാൻഡ് സാനിറ്റൈസർ പുരട്ടിയിരുന്നതായി യുവതി പറഞ്ഞു. കൈയ്യിൽ നിന്നും തീ മുഖത്തേക്കും പടർന്നു. സെക്കന്റുകൾക്കുള്ളിൽ ശരീരമാകെ തീ പടരുകയായിരുന്നു. സമീപത്തു തന്നെയുണ്ടായിരുന്ന ഹാൻഡ് സാനിറ്റൈസറിന്റെ ബോട്ടിലും തീയിൽ പൊട്ടിത്തെറിച്ചതായി യുവതി പറയുന്നു.

അപകട സമയം വീട്ടിലുണ്ടായിരുന്ന യുവതിയുടെ മക്കൾ പുറത്തേക്ക് ഓടിരക്ഷപ്പെട്ടു. നിലവിൽ തീവ്രപരിചരണ വിഭാഗത്തിൽ ചികിത്സയിലാണ് യുവതി. സംഭവത്തിൽ പൊലീസ് അന്വേഷണം ആരംഭിച്ചിട്ടുണ്ട്. ഹാൻസ് സാനിറ്റൈസറിലെ ആൽക്കഹോളിന്റെ അംശം തീപടരാൻ കാരണമായേക്കാം. അതുകൊണ്ട് തന്നെ സാനിറ്റൈസർ ബോട്ടിലുകൾ തീയുടെ സാന്നിദ്ധ്യമുള്ള ഇടങ്ങളിൽ നിന്നും മാറ്റി സ്ഥാപിക്കണമെന്ന് വിദഗ്ദ്ധർ നിർദ്ദേശിക്കുന്നുണ്ട്. സാനിറ്റൈസറുകൾ പുരട്ടിക്കഴിഞ്ഞാൽ അത് പൂർണമായും ത്വക്കിൽ ആഗിരണം ചെയ്യപ്പെടാൻ അനുവദിക്കണമെന്നും ആരോഗ്യവിദഗ്ദ്ധർ ചൂണ്ടിക്കാട്ടുന്നു.