കണ്ണൂർ: കതിരൂരിൽ ബോംബ് നിർമ്മാണത്തിനിടെ ഉണ്ടായ സ്‌ഫോടനത്തിനിടെ ഓടി രക്ഷപ്പെട്ട നാലാമൻ പിടിയിലായി. ബോംബ് നിർമ്മാണത്തിന് കാവൽ നിന്നിരുന്ന പൊന്ന്യം സ്വദേശി അശ്വന്താണ് പിടിയിലായതെന്ന് പൊലീസ് അറിയിച്ചു. സിഒടി നസീർ വധശ്രമ കേസിലെ രണ്ടാം പ്രതിയാണ് ഇയാൾ.
ഇന്നലെ കതിരൂരിലുണ്ടായ സ്‌ഫോടനത്തിൽ മൂന്ന് പേർക്ക് ഗുരുതര പരുക്കേ‌റ്റിരുന്നു മാഹി സ്വദേശികൾ ധീരജ്, റമീഷ് എന്നിവരാണ് തലയ്‌ക്കും കൈയ്‌ക്കും പരുക്കേ‌റ്റത്. ഇതിൽ ധീരജ് ടി.പി.ചന്ദ്രശേഖരൻ പ്രതിയായിരുന്നയാളാണ്. സ്ഥലത്ത് തെളിവ് നശിപ്പിക്കാൻ ഇവിടെയുണ്ടായിരുന്നവർ ശ്രമിച്ചതായി അന്വേഷണത്തിൽ പൊലീസ് കണ്ടെത്തിയിരുന്നു. പൊട്ടാത്ത സ്‌റ്റീൽ ബോംബുകളും സ്ഥലത്ത് നിന്നും കണ്ടെത്തിയിട്ടുണ്ട്.