ന്യൂയോർക്ക്: ലോകത്ത് കൊവിഡ് ബാധിതരുടെ എണ്ണം 27,060,255 ആയി ഉയർന്നു. മരണസംഖ്യയും കുത്തനെ ഉയരുകയാണ്.ഇതുവരെ 883,618 പേരാണ് വൈറസ് ബാധ മൂലം മരണമടഞ്ഞത്. 19,159,799 പേർ രോഗമുക്തി നേടി. വേൾഡോ മീറ്ററിന്റെ കണക്കുപ്രകാരം രോഗബാധിതരുടെ എണ്ണത്തിൽ ഇന്ത്യ ബ്രസീലിനെ മറികടന്ന് ലോകത്ത് രണ്ടാമതായി.

ഇന്ത്യയിൽ കൊവിഡ് ബാധിതരുടെ എണ്ണം 41 ലക്ഷം കടന്നു. വേൾഡോ മീറ്ററിന്റെ കണക്കനുസരിച്ച് രാജ്യത്ത് 4,110,839 പേർക്കാണ് രോഗം സ്ഥിരീകരിച്ചത്. മരണസംഖ്യ എഴുപതിനായിരം കടന്നു. രാജ്യത്ത് തുടർച്ചയായ നാലാംദിനവും പ്രതിദിന മരണം ആയിരം കടന്നു. വെള്ളിയാഴ്ച 1066 പേർ മരിച്ചു. മഹാരാഷ്ട്രയിലാണ് ഏറ്റവും കൂടുതൽ മരണം റിപ്പോർട്ട് ചെയ്തത്. മുപ്പത്തിയൊന്ന് ലക്ഷത്തിലധികം പേർ രോഗമുക്തി നേടി. തുടർച്ചയായ മൂന്നാംദിവസമായ ഇന്നലെയും രോഗികളുടെ എണ്ണം 80,000 കടന്നു.ഒരാഴ്ചയ്ക്കിടെ 5.59 ലക്ഷം പേരാണ് രാജ്യത്ത് രോഗികളായത്. പ്രതിദിന രോഗികളുടെ എണ്ണത്തിൽ ഇന്ത്യയാണ് ആഗോളതലത്തിൽ മുന്നിൽ.

ബ്രിസീലിൽ രോഗികളുടെ എണ്ണം 4,093,586 ആയി. 126,230 പേരാണ് വൈറസ് ബാധമൂലം രാജ്യത്ത് മരണമടഞ്ഞത്. 3,296,702 പേർ രോഗമുക്തി നേടി. രോഗികളുടെ എണ്ണത്തിൽ അമേരിക്ക തന്നെയാണ് ഇപ്പോഴും ലോകത്ത് ഒന്നാമത്. യു.എസിൽ 6,431,152 പേർക്കാണ് ഇതുവരെ കൊവിഡ് സ്ഥിരീകരിച്ചത്. 192,818 പേർ മരിച്ചു. 3,707,000 സുഖം പ്രാപിച്ചു.