മമ്മൂട്ടിയുടെ ജന്മദിനമാണ് ഇന്ന്. മുഖ്യമന്ത്രി പിണറായി വിജയൻ ഉൾപ്പെടെ ലോകത്തിന്റെ നാനാഭാഗത്തിന് നിന്ന് നിരവധിയാളുകളാണ് മെഗാസ്റ്റാറിന് ആശംസയറിയിച്ചുകൊണ്ടിരിക്കുന്നത്.അതിൽ ചിലത് സോഷ്യൽ മീഡിയയിൽ വൈറലുമായിരുന്നു. അത്തരത്തിൽ കോൺഗ്രസ് നേതാവ് കെ.വി തോമസിന്റെ ഫേസ്ബുക്ക് പോസ്റ്റ് സമൂഹമാദ്ധ്യമങ്ങളിൽ ചർച്ചയാകുകയാണ്.

'എൻ്റെ നല്ല വിദ്യാർത്ഥികളിൽ ഒരാളായ പ്രിയപ്പെട്ട മമ്മൂട്ടിക്ക് സ്നേഹത്തോടെ പിറന്നാൾ ആശംസകൾ' എന്നാണ് അദ്ദേഹം ഫേസ്ബുക്കിൽ കുറിച്ചിരിക്കുന്നത്. മമ്മൂട്ടിയ്ക്കൊപ്പമുള്ള ചിത്രം പങ്കുവച്ചുകൊണ്ടായിരുന്നു ആശംസ.

'സാറിന് 74 വയസ് മമ്മൂക്കയ്ക്ക് 69 വയസ് അപ്പോൾ എങ്ങനെ മമ്മൂക്ക സാറിന്റെ വിദ്യാർത്ഥി ആകും' എന്നായിരുന്നു നേതാവിന്റെ പോസ്റ്റ് കണ്ട ഒരാളുടെ സംശയം. കമന്റ് ശ്രദ്ധയിൽപ്പെട്ട കെ.വി തോമസ് എങ്ങനെയാണ് മെഗാസ്റ്റാർ തന്റെ വിദ്യാർത്ഥിയായതെന്ന് വിശദീകരിച്ചു.'1968 ൽ എന്റെ ഇരുപത്തിരണ്ടാം വയസ്സിലാണ് ഞാൻ തേവര തിരുഹൃദയ കലാലയത്തിൽ അദ്ധ്യാപകനായി പ്രവേശിക്കുന്നത്. പ്രീഡിഗ്രി ക്ലാസ്സിൽ കെമിസ്ട്രിയായിരുന്നു എന്റെ അദ്ധ്യാപന വിഷയം. മമ്മൂട്ടി എന്റെ ആദ്യവിദ്യാർത്ഥികളിൽ ഒരാളാണ്'- അദ്ദേഹം വ്യക്തമാക്കി.

അതോടൊപ്പം താൻ കുസൃതി കാണിച്ചതിന് തോമസ് മാഷ് ക്ലാസിൽ നിന്നു പുറത്താക്കിയതായി ഒരു പംക്തിയിൽ മമ്മൂട്ടി തന്നെ കുറിച്ചിരുന്നെന്നും നേതാവ് പറഞ്ഞു. രാജ്യത്തിന്റെ അംഗീകാരം നേടിയ ഒരു വലിയ നടൻ എന്ന നിലയിൽ മാത്രമല്ല എന്റെ വിദ്യാർത്ഥി എന്ന നിലയിലും മമ്മൂട്ടിയോട് എനിക്ക് ഏറെ സ്‌നേഹമുണ്ട്.മട്ടാഞ്ചേരിയിലുള്ള അദ്ദേഹത്തിന്റെ ഭാര്യ വീട്ടുകാരും എനിക്കു ചിരപരിചിതരാണെന്ന് കെ.വി തോമസ് കൂട്ടിച്ചേർത്തു.