ജയ്‌പൂർ: രണ്ട് മാസത്തെ ഇലക്ട്രിസിറ്റി ബിൽ കൈയിൽ കിട്ടിയപ്പോൾ കർഷകനായ പേമാരാം ​പട്ടേലിന് ഷോക്കേറ്റപോലായി. 3.71 കോടി രൂപയായിരുന്നു ബിൽതുക.

രാജസ്ഥാനിലെ ഉദയ്​പൂരിലെ ജിങ്കലാ ഗ്രാമത്തിലെ കർഷകനായ പേമാറാം രണ്ട് മാസത്തിനുള്ളിൽ 38,514,098 യൂണിറ്റ് വൈദ്യുതി ഉപയോഗിച്ചതായും ബില്ലിൽ പറയുന്നു. പേമാരാം വീടിനൊപ്പമുള്ള കെട്ടിടം ഓട്ടോഗാരേജ്​ നടത്തുന്നതിനായി വാടകയ്ക്ക് നൽകിയിട്ടുണ്ട്​. രണ്ടിനും കൂടിയാണ്​ വൻ തുക ബില്ല്​ വന്നത്​. അജ്​മീർ വിദ്യുത്​ വിത്രൻ നിഗം ലിമിറ്റഡാണ്​ ബിൽ നൽകിയത്​.

ബിൽ ലഭിച്ചതിന് പിന്നാലെ രാജസ്ഥാൻ സർക്കാരിന്റെ ഇ-ഗവേൺസ്​ സെന്ററായ ഇ-മിത്രയിലെത്തി പരിശോധിച്ചു. തുടർന്ന്​ പ്രിന്റിംഗിൽ വന്ന തെറ്റാണെന്ന്​ പറഞ്ഞ്​ ഇ-മിത്രയിൽ വച്ച്​ ബിൽ 6,414 രൂപയാക്കി കുറച്ച്​ കൊടുക്കുകയായിരുന്നു. ഉടൻ തന്നെ ആ തുക അടച്ചുവെന്നും പേമാരാം പറഞ്ഞു. ബില്ല്​ വ്യാപകമായി സമൂഹമാദ്ധ്യമങ്ങളിലൂടെ പ്രചരിക്കുന്നുണ്ട്.