വാഴൂർ: വഴിയിൽ പൊട്ടിവീണ വൈദ്യുതി കമ്പി വളർത്തുനായ അപ്പു കടിച്ചുമാറ്റിയില്ലായിരുന്നെങ്കിൽ... അജേഷിന് അത് ഓർക്കാൻ കൂടി വയ്യ!. ഒരു പക്ഷെ, താനായിരിക്കും കമ്പിയിലുടക്കി അപകടത്തിൽ പെടുക. പിന്നാലെ വന്ന അജേഷിന്റെ ജീവൻ രക്ഷപ്പെട്ടെങ്കിലും അപ്പുവിന്റെ ജീവൻ പൊലിഞ്ഞു.

ഇന്നലെ രാവിലെ ചാമംപതാൽ വാഴപ്പള്ളി വിജയന്റെ മകൻ അജേഷ് (32) അയൽവീട്ടിൽ നിന്ന് പാലുവാങ്ങാൻ ഇറങ്ങിയതാണ്. പതിവുപോലെ വളർത്തുനായ അപ്പു മുന്നിൽ നടന്നു. വഴിയിൽ പൊട്ടിക്കിടന്ന കമ്പി കടിച്ചുമാറ്റിയ അപ്പു തെറിച്ചുവീണു. അജേഷ് ഓടിയെത്തിയപ്പോൾ കുരച്ചുകൊണ്ട് തടഞ്ഞു. വീണ്ടും എഴുന്നേറ്റ് കമ്പി കടിച്ചുമാറ്റി. ഇതിനിടെ ഷോക്കേറ്റ് നായ ചത്തു. വീടിന് സമീപം ഇടവഴിയിലാണ് വൈദ്യുതി ലൈൻ പൊട്ടിവീണ് കിടന്നിരുന്നത്. നായ കടിച്ചുമാറ്റാൻ ശ്രമിച്ചില്ലായിരുന്നെങ്കിൽ അജേഷ് ഇതിൽ ചവിട്ടുമായിരുന്നു. കാലപ്പഴക്കം ചെന്ന കമ്പി കൂട്ടിക്കെട്ടിയ ഭാഗം പൊട്ടിവീണതായിരുന്നു. കെ.എസ്.ഇ.ബി.ജീവനക്കാരെത്തി വൈദ്യുതി ബന്ധം വിച്ഛേദിച്ച ശേഷമാണ് നായയുടെ ജഡം മാറ്റിയത്.