മലയാളത്തിന്റെ ലേഡീ സൂപ്പ‌ർസ്‌റ്റാർ എന്ന വിശേഷണത്തിന് ഉടമയാണ് ഇന്ന് മഞ്ജു വാര്യർ. ലോഹിതദാസിന്റെ തിരക്കഥയിൽ സുന്ദർദാസിന്റെ സംവിധാനത്തിൽ ഒരുങ്ങിയ സല്ലാപത്തിലൂടെയാണ് മഞ്ജു മലയാള സിനിമയിലേക്ക് ചുവടു വയ്‌ക്കുന്നത്. ഒരു മഞ്ജു വാര്യർ കാലഘട്ടത്തിന് അവിടെ തുടക്കം കുറിക്കുകയായിരുന്നു. ഇടവേളയ്‌ക്ക് ശേഷം തിരിച്ചെത്തിയ മഞ്ജു വീണ്ടും പ്രേക്ഷകരെ വിസ്‌മയിപ്പിച്ചുകൊണ്ടേയിരിക്കുകയാണ്.
ഈ സമയത്ത്, സുന്ദർദാസ് അടുത്തിടെ ഒരു സ്വകാര്യ ചാനലിന് നൽകി അഭിമുഖം ശ്രദ്ധേയമാവുകയാണ്. സല്ലാപത്തിന് രണ്ടാം ഭാഗം ഒരുക്കുന്നതിനെ കുറിച്ച് ലോഹിയും താനും ആലോചിച്ചിരുന്നുവെന്നും, ദിലീപ് തന്നെയാണ് അതിന് മുൻകൈ എടുത്തതെന്നും സുന്ദർദാസ് പറയുന്നുണ്ട്. മഞ്ജുവിനും ഉണ്ടായിരുന്നു അതിൽ ഒരു പ്രധാന വേഷം. എന്നാൽ അഭിനേത്രി എന്നല്ലെന്നു മാത്രം.
സുന്ദർദാസിന്റെ വാക്കുകൾ-
'ലോഹിതദാസും ഞാനും തമ്മിലുള്ള സൗഹൃദം അറിയാവുന്നവർ പലപ്പോഴും ചോദിച്ചിട്ടുണ്ട് സല്ലാപം കഴിഞ്ഞ് എന്തുകൊണ്ട് ഒരു സിനിമ ചെയ‌്തില്ല എന്ന്. ഞാൻ നിർബന്ധിച്ചിരുന്നെങ്കിൽ ലോഹി സിനിമ എഴുതി തരുമായിരുന്നു. നമ്മൾ വീട്ടുകാരനായി പോയതിന്റെ പ്രശ്‌നമായിരുന്നു. വിരുന്നുകാർക്ക് ആദ്യം കൊടുക്കട്ടെയെന്ന് വിചാരിച്ച് പലപ്പോഴും മാറ്റി വച്ചു. പിന്നീടത് നടന്നില്ല എന്നതാണ് സത്യം. ഒരുദിവസം ദിലീപ് എന്നെ വിളിച്ചു. ലോഹിയേട്ടൻ നമുക്കൊരു സിനിമ ചെയ്യില്ലേ എന്ന് ചോദിച്ചു. ചെയ്യുമെന്ന് ഞാൻ ദിലീപിന് മറുപടിയും നൽകി.
ഞാൻ ലോഹിയെ കണ്ട് കാര്യം പറഞ്ഞു. ചെയ്യാമെന്ന് ലോഹി ഏൽക്കുകയും ചെയ‌്തു. സിനിമ ചെയ്യാമെന്ന് ലോഹിതദാസ് സമ്മതിച്ച കാര്യം ദിലീപിനെ വിളിച്ചു പറഞ്ഞപ്പോൾ, സല്ലാപത്തിന്റെ രണ്ടാം ഭാഗമായാലോ എന്ന് ദിലീപ് ചോദിച്ചു. ആദ്യം യോജിച്ചില്ലെങ്കിലും കൊമേഴ്സ്യലി ഹിറ്റായേക്കാമെന്ന് തോന്നി. അങ്ങനെ ലോഹിയോട് സംസാരിച്ചു. 'രണ്ടാം ഭാഗമൊന്നും ഉണ്ടാകില്ലെടാ 'എന്ന് പുള്ളി അപ്പോൾ തന്നെ പറഞ്ഞു. എന്റെ നായകന്മാരിൽ ഏറ്റവും 'ക്ഷീണിതനായ' നായകനാണ് ശശികുമാർ. പിന്നെങ്ങനെയാണ് സല്ലാപത്തിന് രണ്ടാം ഭാഗം ഉണ്ടാകുന്നതെന്ന് ലോഹി എന്നോട് ചോദിച്ചു. ഞാൻ കുറച്ച് പൊട്ടും പൊടിയും ആശയങ്ങൾ പറഞ്ഞപ്പോൾ ആലോചിക്കാമെന്നായി ലോഹി.
പിന്നീടൊരു ദിവസം ലോഹിയെ വിളിച്ചപ്പോൾ, ഒരു കഥ ആലോചിച്ചിട്ടുണ്ട്, മഞ്ജു അഭിനയിക്കുമോ എന്ന് തിരിച്ചു ചോദിച്ചു. ദിലീപിനീട് ഇക്കാര്യം പറഞ്ഞപ്പോൾ 'അത് നടക്കില്ലെന്നായിരുന്നു' ഉത്തരം. പക്ഷേ മഞ്ജു പ്രൊഡ്യൂസ് ചെയ്യും എന്ന് ദിലീപ് പറഞ്ഞു. അങ്ങനെ ഒരു ശിവരാത്രി ദിവസം ദിലീപും മഞ്ജുവും ലോഹിയുടെ വീട്ടിൽ ഒരുമിച്ചെത്തി ലോഹിക്കും എനിക്കും അഡ്വാൻസ് നൽകി. പക്ഷേ ആ ചിത്രം നടന്നില്ല'.