ലിമ: ഓഫീസിലെ അഴിമതികൾ മറച്ചുവയ്ക്കാൻ ശ്രമിച്ചെന്നാരോപിച്ച് പെറു പ്രസിഡന്റ്​ മാർട്ടിൻ വിസ്ക്കാരെയ്ക്കെതിരെയുള്ള ഇംപീച്ച്​മെന്റ്​ നടപടികൾക്ക്​ തുടക്കമായി. ഇംപീച്ച്മെന്റ് നടപടികൾ ആരംഭിക്കണമെന്ന്​ ആവശ്യപ്പെട്ട്​ പ്രതിപക്ഷം കൊണ്ടുവന്ന പ്രമേയം പാർലമെന്റിൽ പാസായി.
49,500 ഡോളറിന്റെ സർക്കാർ കരാറുകൾ ഗായകനായ റിച്ചാർഡ്​ സിസെൻറോസിന്​ നൽകിയതുമായി ബന്ധപ്പെട്ട അഴിമതിയിലാണ്​ നടപടികൾ​. കൊവിഡ്​ അതിരൂക്ഷമായി തുടരുന്നതിനിടെയാണ്​ വൻ തുക നൽകി ഗായ​കനെ സാംസ്​കാരിക ഉപദേഷ്​ടാവായി നിയമിച്ചത്​.

പ്രതിപക്ഷ നേതാവായ ഇഡഗാർ ആൽറോൺ മൂന്ന്​ വോയ്​സ്​ ക്ലിപ്പുകൾ പുറത്ത്​ വിട്ടതോടെയാണ്​ പ്രസിഡന്റിനെ മാറ്റണമെന്ന ആവശ്യം ശക്​തമായത്​. 49,500 ഡോളർ ഗായകന്​ നൽകാനുള്ള തീരുമാനം രഹസ്യമായിരിക്കണമെന്ന് അടുത്ത അനുയായിയോട്​ മാർട്ടിൻ ആവശ്യപ്പെടുന്നതി​ൻെറ ശബ്​ദ സന്ദേശമാണ്​ പുറത്ത്​ വന്നത്​.

വെള്ളിയാഴ്​ച പാർലമെന്റിൽ അവതരിപ്പിച്ച പ്രമേയത്തെ 65 പേർ അനുകൂലിച്ചപ്പോൾ 35 പേർ എതിർത്തു. 24 പേർ വിട്ടുനിന്നു. 130 അംഗ കോൺഗ്രസിൽ 52 പേരുടെ പിന്തുണയാണ്​ ഇംപീച്ച്​മെന്റ് പ്രമേയം അവതരിപ്പിക്കുന്നതിന്​ വേണ്ടത്. പ്രസിഡന്റിനെ നീക്കാൻ 84​ പേർ പിന്തുണയ്ക്കണം.പാർലമെന്റിൽ ഒമ്പതിൽ ആറ്​ പാർട്ടികളും പ്രമേയത്തിന്​ അനുകൂലമായാണ്​ വോട്ട്​ ചെയ്​തത്​.

 രാജി വയ്ക്കില്ല

ഞാനൊരിക്കലും രാജി വയ്ക്കില്ല. എനിയ്ക്ക് പെറുവിനോട് പ്രതിബദ്ധതയുണ്ട്. എന്റെ അധികാരം അവസാനിക്കുന്ന ദിവസം വരെ ഞാൻ എന്റെ കടമ ചെയ്യും.

-മാർട്ടിൻ വിസ്കാരെ