ന്യൂഡൽഹി: ഇന്ത്യയിൽ കൊവിഡ് ബാധിതരുടെ എണ്ണം കുതിച്ചുയരുന്നു. 94,372 പേർക്കാണ് ഒരു ദിവസത്തിനിടെ രാജ്യത്ത് കൊവിഡ് സ്ഥിരീകരിച്ചത്. ഇതോടെ ആകെ രോഗബാധിതരുടെ എണ്ണം 47,54,356 ആയി ഉയർന്നതായി കേന്ദ്ര ആരോഗ്യമന്ത്രാലയത്തിന്റെ കണക്കുകൾ വ്യക്തമാക്കുന്നു.

രോഗം ബാധിച്ച് 78586 പേർ ആകെ മരിച്ചു. 24 മണിക്കൂറിനിടെ 1114 മരണങ്ങൾ കൂടി റിപ്പോർട്ട് ചെയ്തു. 37,02,595 പേർ രോഗമുക്തി നേടി. ആന്ധ്രപ്രദേശ്, കര്‍ണാടക, തമിഴ്‌നാട് എന്നീ സംസ്ഥാനങ്ങളില്‍ രോഗം സ്ഥിരീകരിക്കുന്നവരുടെ എണ്ണത്തില്‍ ഒരു ദിവസത്തിനിടെയുണ്ടാകുന്ന റെക്കോര്‍ഡ് നിരക്കാണ് രേഖപ്പെടുത്തിയിട്ടുള്ളത്.

കഴിഞ്ഞ കുറച്ചുദിവസങ്ങളായി രാജ്യത്ത് ദിനംപ്രതിയുള്ള കൊവിഡ് രോഗികളുടെ എണ്ണം ഒരു ലക്ഷത്തിനടുത്താണ്‌. ആകെ രോഗികളുടെ എണ്ണത്തില്‍ അമേരിക്കയ്ക്ക് പിറകിലായി രണ്ടാം സ്ഥാനത്താണ് ഇന്ത്യ. അതേസമയം കഴിഞ്ഞ 24 മണിക്കൂറിനിടെ പുതിയ രോഗികളുടെ എണ്ണത്തിലും മരണ നിരക്കിലും ഒന്നാമതാണ് ഇന്ത്യ.