തിരുവനന്തപുരം: കേസെടുത്താലും കെ.ടി ജലീൽ മന്ത്രിസ്ഥാനം രാജിവയ്‌ക്കേണ്ട ആവശ്യമില്ലെന്ന് വ്യക്തമാക്കി സി.പി.എം. ജലീൽ രാജിവയ്‌ക്കേണ്ട കാര്യമില്ലെന്ന് സി.പി.എം കേന്ദ്ര കമ്മിറ്റി അംഗം എം.വി ഗോവിന്ദൻ മാസ്റ്റർ മാദ്ധ്യമങ്ങളോട് പറഞ്ഞു. അത് സി.പി.എമ്മിന്റെ നിലപാടാണ്. പ്രതിപക്ഷമല്ല അതിന്റെ അപ്പുറത്തെ പക്ഷം വന്നാലും ജലീൽ രാജിവയ്‌ക്കുന്ന പ്രശ്‌നമില്ലെന്നും അദ്ദേഹം പറഞ്ഞു.
സ്വർണക്കടത്ത് കേസുമായി ബന്ധപ്പെട്ട് ജലീൽ ഒരു കേസിലും പ്രതിയല്ല. ഒരു പ്രശ്‌നവും അദ്ദേഹത്തിനില്ല. അന്വേഷണം നടക്കട്ടെ. ഒന്നും മറച്ചുവയ്ക്കാനില്ല. എൻ.ഐ.എ വിളിപ്പിച്ചു അദ്ദേഹം പോയി. അതിൽ എന്താണ് തെറ്റെന്നും ഗോവിന്ദൻ മാസ്റ്റർ ചോദിച്ചു. സ്വർണക്കടത്ത് കേസിൽ ഒന്നാം പ്രതിയായി വരേണ്ട ആൾ കേന്ദ്രമന്ത്രി വി.മുരളീധരനാണ്. അദ്ദേഹം ഇപ്പോഴും പറഞ്ഞുകൊണ്ടിരിക്കുന്നത് സ്വർണക്കടത്ത് കോൺസുലേറ്റുമായി ബന്ധപ്പെട്ടല്ല നടന്നത് എന്നാണെന്നും ഗോവിന്ദൻ മാസ്റ്റർ ചൂണ്ടിക്കാട്ടി.
കേസിലെ രണ്ടാമത്തെ ആൾ അനിൽ നമ്പ്യാരാണ്. ഇയാളാണ് പ്രതികൾക്ക് ബുദ്ധി പറഞ്ഞുകൊടുത്തത്. അന്വേഷണം അങ്ങോട്ടേക്ക് പോകാതെ കേസ് അവസാനിക്കില്ലെന്നും എം.വി.ഗോവിന്ദൻ പറഞ്ഞു.