തിരുവനന്തപുരം: വിശ്വശാന്തി ദിനമായ സെപ്‌തംബർ 21 തിങ്കളാഴ്‌ച,​ ഹൈദരാബാദ് ആസ്ഥാനമായ ഹാർട്ട്ഫുൾനെസ് ഫൗണ്ടേഷൻ യുണൈറ്റഡ് നേഷൻസ് ഇൻഫർമേഷൻ സെന്ററുമായി ചേർന്ന് ആഗോളതലത്തിൽ ഓൺലൈനിലൂടെ ധ്യാന - സംഗീത - സമാധാന സന്ദേശ പരിപാടി നടത്തുന്നു. രാത്രി 8 മുതൽ 9.30 വരെയാണ് പരിപാടി.

എട്ട് മണിക്ക് ശാന്തി ആഘോഷം. ഹാർട്ട്ഫുൾനെസ് ഫൗണ്ടേഷൻ അദ്ധ്യക്ഷൻ ഡോ. കമലേഷ് പട്ടേലിന്റെ (ദാജി)​ നേതൃത്വത്തിൽ നടക്കുന്ന പരിപാടിയിൽ വിവിധ രാജ്യങ്ങളിലെ സമാധാന ദൂതന്മാരും സംഗീതജ്ഞരും സംവിധായകൻ ശേഖർ കപൂർ,​ എഴുത്തുകാരൻ ഡോ. ദീപക് ചോപ്ര,​ അമേരിക്കൻ ബയോളജിസ്റ്റ് ഡോ. ബ്രൂസ് ലിപ്റ്റൺ,​ ബ്രഹ്മകുമാരി സിസ്റ്റർ ശിവാനി,​ യു.എൻ മനുഷ്യാവകാശ പ്രവർത്തക അമാൻഡിനെ റോഷെ തുടങ്ങിയവരും പങ്കെടുക്കും. ഹാർട്ട്ഫുൾനെസ് യൂണിറ്റുകളുള്ള നൂറിലേറെ രാജ്യങ്ങളിൽ സംപ്രേഷണം ചെയ്യുന്ന പരിപാടി നാല് കോടി ജനങ്ങളിൽ എത്തുമെന്ന് സംഘാടകർ അറിയിച്ചു. ഇരുപത്തിനാല് ഭാഷകളിൽ തത്സമയ പരിഭാഷയും ഉണ്ടാവും. ഓൺലൈൻ മാദ്ധ്യമങ്ങളും സീ ന്യൂസ്,​ ടി.വി ഏഷ്യ ചാനലുകളും പരിപാടി സംപ്രേഷണം ചെയ്യും.

രാത്രി 9 മണിക്ക് ധ്യാനത്തിലൂടെ ലോകശാന്തി എന്ന ലക്ഷ്യത്തോടെ അരമണിക്കൂർ ഹാർട്ട്ഫുൾനെസ് റിലാക്‌സേഷനും ധ്യാനവും നടക്കും.

യുണൈറ്റഡ് വേ ഒഫ് ഇന്ത്യ,​ ഗ്ലോബൽ സിറ്റിസൺസ് ഇന്ത്യ,​ സ്പിരിറ്റ് ഒഫ് ഹ്യുമാനിറ്റി ഫോറം എന്നീ സംഘടനകളും സഹകരിക്കുന്നുണ്ട്.