ജനീവ: കൊവിഡ് സംബന്ധിച്ച ഏറ്റവും ഗുരുതരമായ രോഗകാലം ഇനിയും വരാനിരിക്കുന്നുവെന്നും, ആരോഗ്യപ്രവർത്തകരുടെ സുരക്ഷയിൽ സർക്കാരുകൾ വീഴ്ച വരുത്തരുതെന്നും ലോകാരോഗ്യസംഘടന അറിയിച്ചു. യൂറോപ്പിൽ സ്ഥിതി ഗുരുതരമാണെന്നും ലോകാരോഗ്യ സംഘടന മുന്നറിയിപ്പ് നൽകുന്നു. കൊവിഡ് ആദ്യഘട്ടമുണ്ടായ മാർച്ച് മാസത്തിലെതിനേക്കാൾ കൂടുതൽ രോഗികൾ യൂറോപ്പിലുണ്ടാകുന്നു. കഴിഞ്ഞയാഴ്ച മാത്രം 3 ലക്ഷത്തിലധികം രോഗികളുണ്ടായത് ആശങ്കയുണ്ടാക്കുന്നതാണെന്നും ലോകാരോഗ്യ സംഘടന വ്യക്തമാക്കി.

ലോകത്ത് കൊവിഡ് ബാധിതരുടെ എണ്ണം മൂന്നുകോടി 32 ലക്ഷത്തിലധികമായി. ഒൻപതര ലക്ഷത്തോളമാണ് ആകെ മരണം.എണ്ണത്തിൽ ഒന്നാമതുള്ള അമേരിക്കയിൽ ചികിത്സയിലുള്ളത് 69 ലക്ഷത്തോളമാണ്. 52 ലക്ഷത്തിലധികം രോഗികളുള്ള ഇന്ത്യയാണ് രണ്ടാമത്.