ചെന്നൈ : പ്രധാനമന്ത്രി നരേന്ദ്ര മോദിയുടെ ജന്മദിനാഘോഷങ്ങൾക്കിടെ വാതകം നിറച്ച ബലൂണുകൾ പൊട്ടിത്തെറിച്ച് നിരവധി ബി.ജെ.പി പ്രവർത്തകർക്ക് പരിക്കേറ്റതായി റിപ്പോർട്ട്. സംഭവത്തിന്റെ വീഡിയോ ദൃശ്യങ്ങൾ സോഷ്യൽ മീഡിയയിൽ വൈറലായിരിക്കുകയാണ്. ചെന്നൈ പാഡി നഗറിലെ ബി.ജെപി പ്രവർത്തകരുടെ ആഘോഷമാണ് പൊട്ടിത്തെറിയിൽ കലാശിച്ചത്. 2,000ത്തോളം വാതക ബലൂണുകളാണ് ആഘോഷ പരിപാടിയിലുണ്ടായിരുന്നത്. ആകാശത്തേക്ക് പറത്തിവിടാനായിരുന്നു ബലൂണുകൾ തയാറാക്കി വച്ചിരുന്നത്. എന്നാൽ ചടങ്ങിന്റെ മുഖ്യാതിഥി എത്തിയപ്പോൾ പടക്കം പൊട്ടിച്ചതാണ് അപകടത്തിനിടെയാക്കിയത്.

More than a dozen BJP workers injured in an explosion in Chennai as fireworks strike helium balloons they held during celebrations on PM Modi's birthday. The gathering was in violation of prohibitory orders in the city.. pic.twitter.com/WMPB7n1Rb2

— J Sam Daniel Stalin (@jsamdaniel) September 19, 2020

പടക്കത്തിന്റെ തീപ്പൊരിയാണ് ബലൂണുകൾ പൊട്ടിത്തെറിക്കാൻ കാരണമെന്നാണ് റിപ്പോർട്ട്. ബലൂണിനുള്ളിൽ ഹൈഡ്രജനാണ് നിറച്ചിരുന്നതെന്നാണ് പ്രാഥമിക വിവരമെങ്കിലും ഔദ്യോഗിക സ്ഥിരീകരണം ഉണ്ടായിട്ടില്ല. കൊവിഡ് പ്രോട്ടോക്കോൾ പാലിക്കാതെയും അധികൃതരുടെ അനുമതിയില്ലാതെയും നടത്തിയ പരിപാടിയുടെ സംഘാടകർക്കെതിരെ പൊലീസ് കേസെടുത്തിട്ടുണ്ട്. പരിക്കേറ്റവരെ ആശുപത്രികളിൽ പ്രവേശിപ്പിച്ചു. ആരുടെയും പരിക്കുകൾ ഗുരുതരമല്ലെന്നാണ് റിപ്പോർട്ട്.