കോഴിക്കോട്: രണ്ടാമൂഴം ഉടൻ സിനിമയാക്കുമെന്ന് എം.ടി. വാസുദേവൻ നായർ. പല സംവിധായകരും തിരക്കഥയ്ക്കായി തന്നെ സമീപിച്ചിട്ടുണ്ടെന്നും സിനിമ വൈകിപ്പോയതിൽ ദുഃഖമുണ്ടെന്നും പറഞ്ഞ അദ്ദേഹം കോടതി വിധിയിൽ സന്തോഷമുണ്ടെന്നും വ്യക്തമാക്കി. രണ്ടാമൂഴം സി​നി​മയാക്കുന്നത് സംബന്ധി​ച്ച് എം ടി​ വാസുദേവൻ നായരും സംവി​ധായകൻ വി​ എ ശ്രീകുമാറും തമ്മി​ലുളള തർക്കത്തി​ൽ കോടതിക്ക് പുറത്ത് ഇരുകൂട്ടരും എത്തി​ച്ചേർന്ന ഒത്തുതീർപ്പ് വ്യവസ്ഥകൾ സുപ്രീംകോടതി​ അംഗീകരി​ച്ചിരുന്നു.

'സ്‌ക്രിപ്റ്റ് തിരിച്ചു കിട്ടണം എന്നതായിരുന്നു എന്റെ ആവശ്യം. സ്‌ക്രിപ്റ്റ് ലഭിക്കുകയും, നൽകിയ അഡ്വാൻസ് തിരിച്ചുകൊടുക്കുകയും ചെയ്യുന്നതോടെ കേസ് തീരും. എനിക്ക് സംവിധാനം ചെയ്യാൻ കഴിയാത്തതിനാൽ അതിന് പറ്റിയ ആളുകളെ കണ്ടെത്തണം. ഇംഗ്ളീഷിലും മലയാളത്തിലുമുളള തിരക്കഥ കൈയിലുണ്ടെങ്കിലും ഏത് ഭാഷയിൽ സിനിമയെടുക്കണമെന്ന് തീരുമാനിച്ചിട്ടില്ല'- എം ടി വ്യക്തമാക്കി.

കഴിഞ്ഞയാഴ്ചയാണ് ഇരുകൂട്ട‌രും കോടതിക്ക് പുറത്ത് കേസ് ഒത്തുതീർപ്പാക്കിയത്. രണ്ടാമൂഴത്തിന്റെ തിരക്കഥ എം ടിക്ക് തിരിച്ചു നൽകും. തിരക്കഥയിൽ പൂർണ അവകാശം എം ടി​ക്കായി​രി​ക്കും. അഡ്വാൻസ് ആയി വി​ എ ശ്രീകുമാറി​ൽ നി​ന്ന് എം ടി വാങ്ങി​യ ഒന്നേകാൽ കോടി തിരിച്ചുനൽകും. രണ്ടാമൂഴത്തിന്റെ പ്രമേയം അടിസ്ഥാനമാക്കി വി​ എ ശ്രീകുമാർ സിനിമ ചെയ്യാൻ പാടി​ല്ല. എന്നാൽ മഹാഭാരതം പ്രമേയമാക്കി സിനിമയെടുക്കാം. പക്ഷേ, ഭീമനെ കേന്ദ്ര കഥാപാത്രമാക്കരുത് എന്നി​വയായി​രുന്നു ഒത്തുതീർപ്പുവ്യവസ്ഥയി​ലെ പ്രധാന വ്യവസ്ഥകൾ.

മോഹൻലാലിനെ നായകനാക്കി സിനിമ ചെയ്യാനായിരുന്നു പദ്ധതി​യി​ട്ടി​രുന്നത് എന്നാൽ കരാർ പ്രകാരമുളള കാലാവധി കഴിഞ്ഞിട്ടും സി​നി​മയുടെചിത്രീകരണം തുടങ്ങാത്ത പശ്ചാത്തലത്തിലാണ് എം ടി കോടതിയെ സമീപിച്ചത്. ഈ കേസ് പിന്നീട് ഹൈക്കോടതിയിലേക്കും സുപ്രീം കോടതിയിലേക്കും എത്തുകയായിരുന്നു.