ഹൈദരാബാദ് : തെന്നിന്ത്യൻ സൂപ്പർ സ്റ്റാ‌ർ പ്രഭാസും ബോളിവുഡ് സൂപ്പർ നായിക ദീപിക പദുക്കോണും ഒന്നിക്കുന്ന പുതിയ തെലുങ്ക് ചിത്രത്തിൽ ക്രിയേറ്റീവ് മെന്ററായി പ്രശസ്ത സംവിധായകനും നടനുമായ സിങ്കീതം ശ്രീനിവാസ റാവു എത്തുന്നു. ശ്രീനിവാസ റാവുവിന്റെ ജന്മദിനത്തോടനുബന്ധിച്ച് ചിത്രത്തിന്റെ സംവിധായകൻ നാഗ് അശ്വിൻ ആണ് ഇക്കാര്യം വെളിപ്പെടുത്തിയിരിക്കുന്നത്.
പ്രഭാസിന്റെ 21ാമത്തെ ചിത്രം കൂടിയായ ഈ സിനിമയ്ക്ക് ഔദ്യോഗികമായി പേരിട്ടിട്ടില്ല. ' പ്രഭാസ് 21 ' എന്നാണ് നിലവിൽ നൽകിയിരിക്കുന്ന പേര്. ചിത്രത്തിന്റെ പ്രൊഡക്ഷന്‍ ഹൗസായ വൈജയന്തി മൂവീസിന്റെ 50ാം വാർഷിക വേളയിലാണ് നാഗ് അശ്വിന്റെ ബിഗ് ബഡ്ജറ്റ് ചിത്രത്തിന്റെ പ്രഖ്യാപനം നടത്തിയത്. തമിഴ്, മലയാളം, ഹിന്ദി, ഇംഗ്ലീഷ് ഭാഷകളിലും ചിത്രം മൊഴിമാറ്റിയെത്തും. ' മഹാനടി'യ്ക്ക് ശേഷം നാഗ് അശ്വിൻ സംവിധാനം ചെയ്യുന്ന ഈ ചിത്രം സയൻസ് ഫിക്ഷൻ ത്രില്ലറാണ്.
' ദീർഘനാളായി കാത്തിരുന്ന ഒരു സ്വപ്നം ഒടുവില്‍ യാഥാർത്ഥ്യമാകുന്നു. ഞങ്ങളുടെ ഇതിഹാസത്തിലേക്ക് സിങ്കീതം ശ്രീനിവാസ റാവു ഗാരുവിനെ സ്വാഗതം ചെയ്യുന്നതില്‍ ഞങ്ങള്‍ക്ക് അതിയായ സന്തോഷമുണ്ട്. അദ്ദേഹത്തിന്റെ സൃഷ്ടിപരമായ മഹാശക്തികള്‍ ഉറപ്പായും ഞങ്ങള്‍ക്ക് വഴികാട്ടിയാവും' സിംഗീതത്തിന്റെ ജന്മദിന പോസ്റ്റര്‍ പങ്കുവെച്ചുകൊണ്ട് വൈജയന്തി മൂവീസ് ട്വിറ്ററില്‍ കുറിച്ചു.
A long awaited dream finally comes true. We are thrilled to welcome #SingeetamSrinivasaRao Garu to our epic.
His creative superpowers will surely be a guiding force for us.#Prabhas @deepikapadukone @nagashwin7 @AshwiniDuttCh @VyjayanthiFilms pic.twitter.com/Mxvbs2s7R9— Vyjayanthi Movies (@VyjayanthiFilms) September 21, 2020
നിര്‍മ്മാതാവ്, തിരക്കഥാകൃത്ത്, സംഗീതസംവിധായകന്‍, ഗായകന്‍, ഗാനരചയിതാവ്, നടന്‍ എന്നീ നിലകളിലും പ്രതിഭ തെളിയിച്ച വ്യക്തിയാണ് സിങ്കീതം ശ്രീനിവാസ റാവു. തെലുങ്ക് സിനിമാ സംവിധായകരുടെ ഗുരുവായി ആണ് അദ്ദേഹത്തെ പരിഗണിക്കുന്നത്.
രണ്ട് ദേശീയ ചലച്ചിത്ര അവാര്‍ഡുകള്‍ അടക്കം നിരവധി പുരസ്‌കാരങ്ങള്‍ സ്വന്തമാക്കിയ അദ്ദേഹം സംവിധാനം ചെയ്ത നിശബ്ദ ചിത്രമായ പുഷ്പക വിമാനം കാൻസ് ഫിലിം ഫെസ്റ്റിവലിൽ ഉൾപ്പെടെ അന്താരാഷ്ട്ര തലത്തിൽ ഏറെ ശ്രദ്ധിക്കപ്പെട്ടിരുന്നു. 1988 ല്‍ പുറത്തിറങ്ങിയ ഈ ചിത്രത്തിൽ കമലഹാസനായിരുന്നു നായകൻ. മികച്ച ചലച്ചിത്രത്തിനുള്ള ദേശീയ ചലച്ചിത്ര അവാര്‍ഡും മികച്ച ചിത്രത്തിനുള്ള ഫിലിംഫെയര്‍ അവാര്‍ഡും ഈ ചിത്രം സ്വന്തമാക്കിയിരുന്നു. മൈക്കിള്‍ മദന കാമരാജന്‍, അപൂര്‍വ്വരാഗം തുടങ്ങിയ കമല്‍ഹാസന്റെ നിരവധി ഹിറ്റ് ചിത്രങ്ങളുടെ സംവിധായകനാണ് സിങ്കീതം ശ്രീനിവാസ റാവു.