90 എണ്ണം ചത്തതായി റിപ്പോർട്ട്

സിഡ്​നി: ആസ്ട്രേലിയയിലെ ഒറ്റപ്പെട്ട തുറമുഖത്തെ മണൽത്തിട്ടകളിൽ 250ഓളം തിമിംഗലങ്ങൾ കുടുങ്ങിയതായി റിപ്പോർട്ട്. ഇതിൽ 90 ഓളം ചത്തു. കൂടുതൽ തിമിംഗലങ്ങളെ മരണത്തിൽ നിന്നും രക്ഷിക്കാനായി രക്ഷാപ്രവർത്തകർ രംഗത്തിറങ്ങി.

ടാസ്​മാനിയൻ പടിഞ്ഞാറൻ തീരത്ത്​ മക്വാരി ഹാർബറിന്​ സമീപം നൂറുകണക്കിന്​ മീറ്റർ നീളമുള്ള മണൽതിട്ട രൂപപ്പെട്ടതോടെയാണ് പൈലറ്റ്​ തിമിംഗലങ്ങൾ കൂട്ടത്തോടെ കുടുങ്ങിയത്​.

മൂന്നു​ സ്ഥലങ്ങളിലായി കുടുങ്ങിക്കിടക്കുന്ന ഇവയെ രക്ഷപ്പെടുത്താൻ ശ്രമം ആരംഭിച്ചിട്ടുണ്ട്​. തിങ്കളാഴ്​ച ഉച്ചയ്ക്ക് ശേഷം സർക്കാറിന്റെ മറൈൻ കൺസർവേഷൻ സംഘം തിമിംഗലകൾക്ക്​ അടുത്തെത്തി ആരോഗ്യസ്ഥിതി വിലയിരുത്തിയിരുന്നു. ഇന്നലെ കുടുങ്ങിക്കിടക്കുന്നവയെ രക്ഷപ്പെടുത്തി കടലിലേക്ക്​ വിടുന്നതിനുള്ള ശ്രമങ്ങൾ ആരംഭിച്ചു. പ്രാദേശിക മത്സ്യത്തൊഴിലാളികൾ ഉൾപ്പെടെ 60ഓളം പേരാണ് രക്ഷാപ്രവർത്തനത്തിന് ചുക്കാൻ പിടിക്കുന്നത്.