ന്യൂഡൽഹി: ഇന്ത്യയിൽ നിന്ന് സൗദിയിലേക്കും തിരിച്ചുമുളള വിമാനസർവീസുകൾ സൗദി അറേബ്യ നിറുത്തലാക്കി. ഇന്ത്യയിൽ കൊവിഡ് രോഗികൾ പെരുകുന്ന സാഹചര്യത്തിലാണ് സൗദിയുടെ നടപടി എന്നാണ് റിപ്പോർട്ട്. ഇനിയൊരു അറിയിപ്പ് ഉണ്ടാകുന്നതുവരെ നിരോധനം തുടരും. സൗദി വ്യോമയാന അതോറിറ്റി വിമാനകമ്പനികൾക്ക് ഇതുസംബന്ധിച്ച് നിർദ്ദേശം കൈമാറി.

ഇന്ത്യയിലെ ആകെ രോഗികളുടെ എണ്ണം 56 ലക്ഷം കടന്നു എന്നാണ് റിപ്പോർട്ട്. മരണം 90,000 ത്തിനടുത്തെത്തി.

രോഗബാധിതരുടെ എണ്ണത്തിൽ രണ്ടാം സ്ഥാനത്തുള്ള ഇന്ത്യയിൽ രോഗമുക്തി നിരക്കിൽ റെക്കോർഡ് വർദ്ധനവാണ് കഴിഞ്ഞ ദിവസം റിപ്പോർട്ട് ചെയ്തത്. ഇന്നലെ ഒരു ലക്ഷത്തിലധികം പേർ (1,01,468) രോഗമുക്തി നേടി. 45 ലക്ഷത്തോളം പേരാണ് ഇതുവരെ രോഗമുക്തരായത്. ഇതിൽ 79 ശതമാനവും മഹാരാഷ്ട്ര, കർണാടക, ആന്ധ്രപ്രദേശ്, ഉത്തർപ്രദേശ്, തമിഴ്‌നാട്, ഒഡീഷ, ഡൽഹി, കേരളം, പശ്ചിമബംഗാൾ, പഞ്ചാബ് എന്നീ സംസ്ഥാനങ്ങളിൽ നിന്നാണ്.