മോസ്കോ : യേശു ക്രിസ്തുവിന്റെ പുനർജന്മമാണെന്ന് അവകാശപ്പെട്ട് ആളുകളെ കബളിപ്പിച്ച ആൾദൈവത്തെ പൊക്കി റഷ്യൻ പൊലീസ്. 59 കാരനായ സെർജി ടോറൊപിനെയാണ് പൊലീസ് അകത്താക്കിയത്. യേശു ക്രിസ്തുവിന്റെ പുനർജന്മമാണെന്നും പറഞ്ഞ് വിശ്വാസികളെ കൈയ്യിലെടുത്ത് അവരെ മാനസികമായി ചൂഷണം ചെയ്ത സെർജി വിശ്വാസത്തിന്റെ മറവിൽ അവരിൽ നിന്ന് പണം തട്ടിയെടുക്കുകയും ചെയ്തു.

സൈബീരിയയിൽ വച്ച് റഷ്യൻ ഫെഡറൽ സെക്യൂരിറ്റി ഫോഴ്സിന്റെ നേതൃത്വത്തിൽ ഹെലികോപ്ടറുകളുടെയും സായുധ സേനയുടെയും അകമ്പടിയോടെ പ്രത്യേക ഓപ്പറേഷനിലൂടെയാണ് അനുയായികൾക്കിടെയിൽ നിന്നും ഇയാളെ അറസ്റ്റ് ചെയ്തത്. സെർജിയെ ഹെലികോപ്ടർ വഴിയാണ് സൈബീരിയയിൽ നിന്നും പൊലീസ് കൊണ്ടുപോയത്. ഒരു മുൻ ട്രാഫിക് പൊലീസ് ഉദ്യോഗസ്ഥനായ സെർജി അനുയായികൾക്കിടെയിൽ അറിയപ്പെട്ടിരുന്നത് ' വിസാരിയോൺ ' എന്ന പേരിലായിരുന്നു.

മുടി നീട്ടി വളർത്തി താടിയുമായി രൂപത്തിലും ഭാവത്തിലും ആത്മീയത പുലർത്തിയ ഇയാൾ അനുയായികളെ മാനസികമായി തന്റെ അടിമകളാക്കി മാറ്റുകയായിരുന്നു. 1989ൽ ട്രാഫിക് പൊലീസിലെ ജോലി പോയ സെർജിയ്ക്ക് ഒരു പ്രത്യേക ' ബോധോദയം ' ഉണ്ടായതായും തുടർന്നാണ് 1991ൽ ' ദ ചർച്ച് ഒഫ് ലാസ്റ്റ് ടെസ്റ്റമെന്റ് ' എന്ന സംഘടന രൂപീകരിച്ച് സ്വയം ആത്മീയ നേതാവായെന്നുമാണ് പറയുന്നത്. ' ഞാൻ ദൈവമല്ല. യേശുവിനെ ദൈവമായി കാണുന്നത് തെറ്റാണ്. ഞാൻ പിതാവായ ദൈവത്തിന്റെ ജീവനുള്ള വചനമാണ്. ദൈവം പറയാൻ ആഗ്രഹിക്കുന്നതെല്ലാം അദ്ദേഹം എന്നിലൂടെ പറയുന്നു ....' അനുയായികളോട് ഇങ്ങനെയൊക്കെയാണ് സെർജി ഇത്രയും കാലം തട്ടിവിട്ടിരുന്നത്.

വളരെ വേഗത്തിൽ അനുയായികൾക്കിടെയിൽ ശക്തനായ കൾട്ട് ലീഡറായി വളർന്ന സെർജിയ്ക്ക് സൈബീരിയൻ വനാന്തര മേഖലയിൽ 20 ഓളം ആരാധനാലയങ്ങൾ ഉണ്ടെന്നാണ് പറയപ്പെടുന്നത്. ഇവിടെ 4,000 ത്തിലധികം അനുയായികളാണ് സെർജിയ്ക്കുള്ളത്. സെ‌ർജിയുടെ അടുത്ത അനുയായികളായ വ്ലാഡിമിർ റെഡ്കിൻ, വ്ലാഡിമിർ വെഡെർനികോവ് എന്നിവരെയും പൊലീസ് പിടികൂടിയിട്ടുണ്ട്. സൈബീരിയയിലെ വിദൂര പ്രദേശമായ ക്രാസ്നോയാർസ്ക് ആണ് ജെർജിയുടെ ആത്മീയ സംഘടനയുടെ ആസ്ഥാനം. റഷ്യയിലെ ഉദ്യോഗസ്ഥർ മുതൽ തീർത്ഥാടകർ വരെ പലരും ഈ കൾട്ടിലേക്ക് പരിവർത്തനം നടത്തി ക്രാസ്നോയാർസ്കിലുണ്ടെന്നാണ് വിവരം.

സെർജിയുടെ ജന്മദിനമായ ജനുവരി 14നാണ് അയാളുടെ അനുയായികൾ ക്രിസ്മസ് ആചരിച്ചിരുന്നത്. യേശു ഭൂമിയോടടുത്തുള്ള ഒരു ഭ്രമണപഥത്തിൽ നിന്നും മനുഷ്യരെ നിരീക്ഷിക്കുന്നുണ്ടെന്നും കന്യാമറിയമാണ് റഷ്യയെ നയിക്കുന്നതെന്നുമായിരുന്നു സെർജി ആദ്യം അനുയായികൾക്ക് മുന്നിൽ അവതരിപ്പിച്ച തത്വം. എന്നാൽ വൈകാതെ താൻ തന്നെയാണ് യേശു എന്ന് ഇയാൾ പ്രഖ്യാപിക്കുകയായിരുന്നു.