ന്യൂഡൽഹി: കാർഷിക ബില്ലിനെതിരെ സമരം ചെയ്ത കർഷകരെ ഭീകരവാദികളെന്ന് വിളിച്ച നടി കങ്കണ റാവത്തിനെതിരെ പരാതി നൽകി അഭിഭാഷകൻ. രമേശ് നായിക് എന്ന അഭിഭാഷകനാണ് കർണാടകയിലെ പ്രദേശിക കോടതിയിൽ നടിയ്ക്കെതിരെ പരാതി നൽകിയത്. സമൂഹത്തിൽ കലാപമുണ്ടാക്കണമെന്ന ലക്ഷ്യത്തോടെയാണ് കങ്കണയുടെ പ്രസ്താവനയെന്ന് ചൂണ്ടിക്കാട്ടിയാണ് പരാതി. തന്റെ ട്വീറ്റിലൂടെയായിരുന്നു കങ്കണ പ്രതിഷേധക്കാർക്കെതിരെ രംഗത്ത് വന്നത്.

കങ്കണയുടെ പോസ്റ്റ് വിവിധ പ്രത്യയ ശാസ്ത്രങ്ങൾ വിശ്വസിക്കുന്നവർ തമ്മിൽ സംഘട്ടനത്തിന് കാരണമായേക്കാമെന്നും പരാതിയിൽ പറയുന്നു. സർക്കാർ ഇതിനെതിരെ കണ്ണടച്ചിരിക്കുകയാണെന്നും ഇത്തരം വിവാദ പ്രസ്താവനകൾ നിയന്ത്രിക്കാൻ നടപടിയോ ചട്ടങ്ങളൊ ഇല്ലെന്നും അഭിഭാഷകൻ കോടതിയിൽ നൽകിയ പരാതിയിൽ പറഞ്ഞു. ആവശ്യമായ നടപടികൾ സ്വീകരിക്കാതെ സർക്കാർ മൗനം പാലിക്കുകയാണെന്നും പരാതിയിൽ പറയുന്നു.

" സി‌.എ‌.എയെക്കുറിച്ച് തെറ്റായ വിവരങ്ങളും കിംവദന്തികളും പ്രചരിപ്പിച്ച ആളുകൾ തന്നെയാണ് ഇപ്പോൾ കർഷക ബില്ലിനെക്കുറിച്ച് തെറ്റായ വിവരങ്ങൾ പ്രചരിപ്പിക്കുന്നത്. ഇവർ രാജ്യത്ത് ഭീകരത സൃഷ്ടിക്കുന്നു. ഇവർ തീവ്രവാദികളാണ്. " എന്നായിരുന്നു കങ്കണയുടെ ട്വീറ്റ്. കാർഷിക ബില്ലിനെതിരെ രാജ്യവ്യാപകമായി പ്രതിഷേധ സമരങ്ങൾ അരങ്ങേറുമ്പോഴാണ് കങ്കണയുടെ വിവാദ ട്വീറ്റ്.

People who spread misinformation and rumours about CAA that caused riots are the same people who are now spreading misinformations about Farmers bill and causing terror in the nation, they are terrorists. You very well know what I said but simply like to spread misinformation 🙂 https://t.co/oAnBTX0Drb

— Kangana Ranaut (@KanganaTeam) September 21, 2020