റായ്പൂർ: ടിബറ്റൻ ബോർഡർ പൊലീസിന്റെ (ഐ.ടി.ബി.പി) 'സോഫിയ' എന്ന നായയുടെ ബുദ്ധിസാമർത്ഥ്യം കാരണം രക്ഷപ്പെട്ടത് നിരവധി സൈനികരുടെ ജീവനുകൾ. ഛത്തീസ്ഗഡിലെ രാജ്നന്ദ്ഗാവ് ജില്ലയിലെ നക്സൽ ഹിറ്റ് ബക്കർ കട്ട ഗ്രാമത്തിൽ അസിസ്റ്റന്റ് കമാൻഡന്റ് റിഷ്പാൽ സിംഗും 55 സൈനികരും ഞായറാഴ്ച പുലർച്ചെ 5 മണിയോടെ പെട്രോളിംഗ് നടത്തിയിരുന്നു.

പരിശീലനം ലഭിച്ച മാലിനോയിസ് നായയും ഇവർക്കൊപ്പമുണ്ടായിരുന്നു. സ്റ്റാർട്ട് പോയിന്റിൽ നിന്ന് 13 കിലോമീറ്റർ കാൽനടയായി സഞ്ചരിച്ച് സംഘം പാണ്ഡ്രിപ്പാനി കാടുകളിൽ എത്തി. ആ സമയത്ത് ഒരു മരത്തിനടുത്തുവച്ച് സോഫിയയ്ക്ക് എന്തോ പന്തികേടു തോന്നി.

സൈനികർക്കും മരത്തിനും ഇടയിൽ ഒരു മതിൽ പോലെ അവൾ നിന്നു. സോഫിയയുടെ പെരുമാറ്റത്തിൽ നിന്ന് കാര്യം മനസിലാക്കിയ ഉദ്യോഗസ്ഥർ ഉടൻ തന്നെ ഐ.ടി.ബി.പി സൈനികരെ തന്ത്രപരമായി പ്രദേശത്ത് വിന്യസിച്ചു. മരത്തിന് സമീപം സ്‌ഫോടകവസ്തുക്കൾ ഉണ്ടെന്ന സോഫിയയുടെ സംശയം ശരിയായിരുന്നു.

സിമന്റ് ഉപയോഗിച്ച് മറച്ച ഒരു വലിയ കണ്ടെയ്നർ അവിടെ ഉദ്യോഗസ്ഥർ കണ്ടെത്തി. വയറുകൾ പുറത്തേക്ക് വന്നരീതിയിലായിരുന്നു അത്. സ്‌ഫോടകവസ്തു നിറച്ച ആ കണ്ടയ്നർ ഉദ്യോഗസ്ഥർ നീക്കം ചെയ്തു.തങ്ങളെ രക്ഷിച്ച സോഫിയയെ കെട്ടിപ്പിടിച്ച് സൈനികർ നന്ദി പറഞ്ഞു.