കന്മദം സിനിമയിലൂടെ പ്രേക്ഷകരുടെ പ്രിയപ്പെട്ട മുത്തശ്ശിയായി മാറിയ ശാരദ നായർ (92) അന്തരിച്ചു. കന്മദത്തിന് പുറമെ ജയറാം ചിത്രമായ പട്ടാഭിഷേകത്തിലും ശ്രദ്ധേയമായ വേഷം കൈകാര്യം ചെയ‌്തിരുന്നു. തത്തമംഗലം കാദംബരിയിൽ പരേതനായ പുത്തൻ വീട്ടിൽ പത്മനാഭൻ നായരുടെ ഭാര്യയാണ് പേരൂർ മൂപ്പിൽ മഠത്തിൽ ശാരദ നായർ.

ലോഹിതദാസിന്റെ സംവിധാനത്തിൽ 1998ൽ പുറത്തിറങ്ങിയ കന്മദത്തിലെ മുത്തശ്ശി വേഷം ശാരദ നായരെ ഏറെ ശ്രദ്ധേയയാക്കിയിരുന്നു. മോഹൻലാലിനൊപ്പമുള്ള സീനുകളിൽ വാത്സല്യ നിധിയായ മുത്തശ്ശിയായി മാറിയ ശാരദ നായരുടെ പ്രകടനം പ്രേക്ഷകഹൃദയം കവർന്നു. 1999ൽ ആയിരുന്നു പട്ടാഭിഷേകം റിലീസ് ചെയ‌്തത്.