പാലക്കാട്: ജില്ലയിൽ പാമ്പ് പിടിത്തത്തിന് ഔദ്യോഗിക പരിശീലനം പൂർത്തിയാക്കിയത് 121 വനപാലകർ. പാലക്കാട് ഈസ്റ്റേൺ സർക്കിളിന് കീഴിൽ വരുന്ന വനം ഡിവിഷനുകളിലെയും സൈലന്റ് വാലി ഡിവിഷനിലെയും ജീവനക്കാരാണ് വനം വകുപ്പിന്റെ നേതൃത്വത്തിൽ ശാസ്ത്രീയ പരിശീലനം പൂർത്തിയാക്കിയത്.

സെക്ഷൻ ഫോറസ്റ്റ് ഓഫീസർ, ബീറ്റ് ഫോറസ്റ്റ് ഓഫീസർ, ഫോറസ്റ്റ് വാച്ചർമാർ എന്നിവർക്കാണ് ഒലവക്കോട് ധോണി, മുക്കാലി, നിലമ്പൂർ എന്നിവിടങ്ങളിലായി പരിശീലനം നൽകിയത്.

പദ്ധതി ഇങ്ങനെ

• പാമ്പുകളുടെ വർഗീകരണം, ആവാസ വ്യവസ്ഥ, തിരിച്ചറിയുന്ന വിധം, കൈകാര്യം ചെയ്യൽ, കടിയേറ്റാൽ ശ്രദ്ധിക്കേണ്ടവ തുടങ്ങിയവ അടിസ്ഥാനമാക്കി പരിശീലനം.
• പരിശീലനം പൂർത്തിയാക്കിയവർക്കേ പാമ്പിനെ പിടികൂടാൻ യോഗ്യതയുള്ളൂ.
• അതത് ഡി.എഫ്.ഒ, റേഞ്ച് എന്നിവയുടെ നിയന്ത്രണത്തിലാണ് ഇവർ പ്രവർത്തിക്കുക.
• പാമ്പിനെ പിടികൂടുന്നതിന് വേണ്ട ഉപകരണങ്ങളും നൽകും.
• പരിശീലനം നേടാത്തവർ പാമ്പിനെ പിടികൂടുകയോ പ്രദർശിപ്പിക്കുകയോ ചെയ്താൽ കേസെടുക്കും.