തിരുവല്ല: ശക്തമായ മഴയിൽ കഴിഞ്ഞദിവസം തകർന്നുവീണ പുളിക്കീഴ് പൊലീസ് സ്റ്റേഷൻ കെട്ടിടത്തിന്റെ മേൽക്കൂര ട്രാവൻകൂർ ഷുഗേഷ്സ് ആന്റ് കെമിക്കൽസ് ലിമിറ്റഡ്(ടി.എസ്.സി.എൽ) നവീകരിച്ച് നൽകും. ദ്രവിച്ച പട്ടികകളും കഴുക്കോലും പൊട്ടിയ ഓടുകളും മാറ്റി മേൽക്കൂര പൂർണമായും നവീകരിക്കും. സ്റ്റേഷൻ കെട്ടിടത്തോട് ചേർന്ന് അപകട ഭീഷണി ഉയർത്തി നിലനിൽക്കുന്ന പുളിമരവും മുറിച്ചുനീക്കും. മേൽക്കൂരയുടെ നവീകരണ പ്രവർത്തനങ്ങൾ നാളെ ആരംഭിക്കുമെന്ന് ട്രാവൻകൂർ ഷുഗേഷ്സ് ആന്റ് കെമിക്കൽസ് ഡെപ്യൂട്ടി ജനറൽ മാനേജർ അലക്സ് പി.ഏബ്രഹാം പറഞ്ഞു. ട്രാവൻകൂർ ഷുഗേഷ്സ് ആന്റ് കെമിക്കൽസിന്റെ ഉടമസ്ഥതയിലുള്ള കെട്ടിടം 1984ൽ പൊലീസ് സ്റ്റേഷന്റെ പ്രവർത്തനത്തിനു വേണ്ടി വിട്ടുനൽകിയത്. പിന്നീടിങ്ങോട്ട് അറ്റകുറ്റപ്പണികൾ ഒന്നും തന്നെ നടത്താതിരുന്നതിനാൽ കെട്ടിടത്തിന്റെ മേൽക്കൂര ഏതാണ്ട് പൂർണമായും തകർന്നിരുന്നു.