കോന്നി: ഗവ.മെഡിക്കൽ കോളേജിലെ നിർമ്മാണം പൂർത്തീകരിച്ച മൂന്നാമത്തെയും നാലാമത്തെയും ലിഫ്റ്റുകളുടെ കമ്മിഷനിംഗ് അഡ്വ.കെ.യു.ജനീഷ് കുമാർ എം.എൽ.എയും ജില്ലാ കളക്ടർ പി.ബി.നൂഹും നിർവഹിച്ചു. ആശുപത്രിയിൽ ഇതോടെ നാല് ലിഫ്റ്റുകളുടെ നിർമ്മാണം പൂർത്തിയായി. രണ്ടെണ്ണത്തിന്റെ കമ്മിഷനിംഗ് നേരത്തേ നടത്തിയിരുന്നു.
20 ആളുകൾക്ക് കയറാനും സ്ട്രക്ച്ചർ കയ​റ്റാനും കഴിയുന്ന ബെഡ് ലിഫ്റ്റാണ് കമ്മിഷൻ ചെയ്തത്. രണ്ട് ലിഫ്റ്റിനായി 80 ലക്ഷം രൂപയാണ് ചെലവിട്ടത്. മുംബൈ ആസ്ഥാനമായ കോൺ എ കമ്പനിയ്ക്കായിരുന്നു നിർമ്മാണ ചുമതല.
മെഡിക്കൽ കോളേജ് സൂപ്രണ്ട് ഡോ.സജിത്കുമാർ, എച്ച്.എൽ.എൽ ചീഫ് പ്രൊജക്ട് മാനേജർ ആർ.രതീഷ് കുമാർ, നാഗാർജ്ജുന കൺസ്ട്രക്ഷൻ കമ്പനി പ്രൊജക്ട് മാനേജർ അജയകുമാർ തുടങ്ങിയവർ പങ്കെടുത്തു.

കുടിവെള്ളം എത്തുന്നു

കോന്നി: ഗവ.മെഡിക്കൽ കോളേജ് വാട്ടർ സപ്ലെ സ്‌കീമിന്റെ ട്രീ​റ്റ്‌മെന്റ് പ്ലാന്റിൽ വെള്ളമെത്തി. നേരത്തെ പമ്പിംഗ് നടത്തിയപ്പോൾ വട്ടമൺ ഭാഗത്ത് പൈപ്പ് പൊട്ടിയിരുന്നു. പ്രശ്‌നങ്ങൾ പരിഹരിച്ചാണ് ഇന്നലെ വീണ്ടും പമ്പിംഗ് നടത്തിയത്.
ഇനിയും 325 മീ​റ്റർ ദൂരം മാത്രമാണ് പൈപ്പിലൂടെ മെഡിക്കൽ കോളേജിലേക്ക് വെള്ളം എത്തിക്കുന്നതിനുള്ളത്. ഞായറാഴ്ച മെഡിക്കൽ കോളേജ് ആശുപത്രിയിൽ വെള്ളം എത്തിക്കുമെന്ന് വാട്ടർ അതോറി​റ്റി പ്രൊജക്ട് വിഭാഗം അസി.എക്‌സി.എൻജിനിയർ അൻസിൽ ജോർജ്ജ്, അസി.എൻജിനിയർ ആർ.ശ്രീലേഖ എന്നിവർ പറഞ്ഞു.