കോന്നി: വള്ളിക്കോട് പി.എച്ച്.സി ഇനി ബ്ലോക്ക് തല കുടുംബാരോഗ്യ കേന്ദ്രം.
കമ്മ്യൂണി​റ്റി ഹെൽത്ത് സെന്ററുകളെയാണ് ബ്ലോക്ക് തല ഫാമിലി ഹെൽത്ത് സെന്ററായി ഉയർത്തുന്നത്. എന്നാൽ കോന്നി താലൂക്ക് ആശുപത്രിയിൽത്തന്നെ കമ്മ്യൂണി​റ്റി ഹെൽത്ത് സെന്റർ പ്രവർത്തിക്കുകയായിരുന്നു.ഇതേ തുടർന്നാണ് വള്ളിക്കോട് പി.എച്ച്.സി യെ ബ്ലോക്ക് തല കടുംബാരോഗ്യ കേന്ദ്രമായി ഉയർത്താൻ തീരുമാനിച്ചത്. കിടത്തിച്ചികിത്സ ഉൾപ്പടെയുള്ളവ ഭാവിയിൽ ഇവിടെ ലഭിക്കും.
രോഗീ സൗഹൃദ സൗകര്യങ്ങൾ ഒരുക്കാൻ 37.5 ലക്ഷം രൂപ അനുവദിച്ചതായി കെ.യു.ജനീഷ് കുമാർ എം.എൽ.എ അറിയിച്ചു. ചികിത്സ തേടി എത്തുന്നവർക്ക് ഇരിപ്പിടം, കുടിവെള്ളം, മ​റ്റ് സൗകര്യങ്ങൾ തുടങ്ങിയവ ഒരുക്കും.എൻ.എച്ച്.എം നാണ് നിർവഹണ ചുമതല . 40 ലക്ഷം രൂപ ചെലവിൽ പുതിയ കെട്ടിടം നിർമ്മിക്കുന്നുണ്ട്.
മെഡിക്കൽ കോളേജിനൊപ്പം പ്രാഥമിക ആരോഗ്യ കേന്ദ്രത്തെയും താലൂക്ക് ആശുപത്രിയെയും മികച്ച നിലയിലാക്കാനാണ് പരിശ്രമിക്കുന്നതെന്ന് എം.എൽ.എ പറഞ്ഞു. നിയോജക മണ്ഡലത്തിലെ എല്ലാ സർക്കാ ആശുപത്രികളിലും വിവിധ പദ്ധതികളിലുൾപ്പെടുത്തിയുള്ള നിർമ്മാണ പ്രവർത്തനങ്ങൾ നടക്കുകയാണ്. കോന്നി താലൂക്ക് ആശുപത്രിയിൽ 10 കോടി രൂപയുടെ വികസനമാണ് നടത്തുന്നത്. ഇതിന്റെ നിർമ്മാണവും ഉടനെ ആരംഭിക്കും.

------------

രോഗീ സൗഹൃദ സൗകര്യത്തിന് 37.5 ലക്ഷം രൂപ അനുവദിച്ചു

40 ലക്ഷം രൂപ ചെലവിൽ പുതിയ കെട്ടിട നിർമ്മാണം