കോന്നി: അത്യാധുനിക രീതിയിൽ നവീകരിക്കുന്ന അഞ്ഞിലികുന്ന് കോട്ടമുക്ക് റോഡിന്റെ നിർമ്മാണ ഉദ്ഘാടനം മന്ത്രി ജി.സുധാകരൻ നിർവഹിച്ചു. കിഴക്കുപുറം വായനശാല ജംഗ്ഷനിൽ നടന്ന യോഗത്തിൽ അഡ്വ.കെ.യു ജെനീഷ് കുമാർ എം.എൽ.എ അദ്ധ്യക്ഷത വഹിച്ചു. ജനപ്രതിനിധികളായ ശേഷമുള്ള ആദ്യ കൂടിക്കാഴ്ചയിൽ തന്നെ റോഡിന്റെ പ്രാധാന്യം മന്ത്രിയുടെ ശ്രദ്ധയിൽ പെടുത്തുവാൻ കഴിഞ്ഞതായും,ആറ് മാസം കൊണ്ട് റോഡ് നിർമ്മാണം പൂർത്തീകരിക്കാനാണ് ലക്ഷ്യമിടുന്നതെന്നും എം.എൽ.എ പറഞ്ഞു.
6 മീറ്റർ വരെ താഴ്ചയിലുള്ള സ്ഥലങ്ങളിൽ സംരക്ഷണ ഭിത്തി
5.5 മീറ്റർ വീതിയിൽ 6 കോടി രൂപ മുതൽ മുടക്കി ബി.എം ആൻഡ് ബി.സി നിലവാരത്തിലാണ് റോഡ് നവീകരിക്കുന്നത്.നിലവിൽ ഈ റോഡിന് 3.8 മീറ്റർ വീതിയിൽ മാത്രമാണ് ടാറിംഗ് ഉള്ളത്.നാലു കിലോമീറ്ററിലധികം ദൂരമുള്ള റോഡിൽ ഒരു പൈപ്പ് കലുങ്കും 450 മീറ്റർ നീളത്തിൽ ഓട നിർമ്മാണവും,1000 മീറ്റർ ഐറീഷ് ഓടയും നിർമ്മിയ്ക്കും.മുന്നറിയിപ്പ് ബോർഡുകൾ,ദിശ സൂചിക ബോർഡുകൾ,ക്രാഷ് ബാരിയർ,റോഡ് സ്റ്റഡ്‌സ് എന്നിവയും സുരക്ഷാ മുൻകരുതലുകളുടെ ഭാഗമായി സ്ഥാപിയ്ക്കും.റോഡിന്റെ ഒരു വശത്തായി 6 മീറ്റർ വരെ താഴ്ചയിലുള്ള സ്ഥലങ്ങളിൽ സംരക്ഷണ ഭിത്തി നിർമ്മാണവും പദ്ധതിയുടെ ഭാഗമായി വിഭാവനം ചെയ്തിട്ടുണ്ട്.
പദ്ധതിയിൽ വകയിരുത്തിയിരിക്കുന്നത്
വൈദ്യുതി പോസ്റ്റുകളും,ട്രാൻസ്‌ഫോർമാറുകളും,വാട്ടർ അതോറിറ്റി പൈപ്പുകളും മാറ്റി സ്ഥാപിക്കുന്നതിനും പദ്ധതിയിൽ തുക വകയിരുത്തിയിട്ടുണ്ട്. മലയാലപ്പുഴ ദേവീക്ഷേത്രം,പൊന്നമ്പി പള്ളി എന്നീ പ്രസിദ്ധമായ ആരാധനാലയങ്ങളിലേക്കുള്ള പ്രധാന പാതയാണിത്.ശബരിമല തീർത്ഥാടകരും അടവി,ഗവി,അനക്കൂട് എന്നിവിടങ്ങളിലേക്ക് പോകുന്ന ടൂറിസ്റ്റുകളും ഉപയോഗിക്കുന്ന റോഡ് ആധുനിക നിലവാരത്തിലേക്ക് മാറുന്നതോടെ പ്രദേശത്തിന്റെ മുഖച്ഛായയ്ക്ക് തന്നെ മാറ്റമുണ്ടാകും.
കോന്നി ബ്ലോക്ക് പഞ്ചായത്ത് പ്രസിഡന്റ് കോന്നിയൂർ പി.കെ,മലയാലപ്പുഴ പഞ്ചായത്ത് പ്രസിഡന്റ് കെ.ജയലാൽ, എലിസബത്ത് രാജു,ബെന്നി ഈട്ടിമൂട്ടിൽ,മലയാലപ്പുഴ മോഹനൻ,മലയാലപ്പുഴ ശശി,സാമൂവേൽ കിഴക്കുപുറം,അജിത് രാമചന്ദ്രൻ, ഷീന രാജൻ,റസീന.എസ്,ജിജോ മോഡി,ഒ.ആർ സജി എന്നിവർ സംസാരിച്ചു.
-----
-ചെലവ് 5.5 മീറ്റർ വീതിയിൽ 6 കോടി രൂപ
-450 മീറ്റർ നീളത്തിൽ ഓട
-1000 മീറ്റർ ഐറീഷ് ഓട
-മുന്നറിയിപ്പ് ബോർഡുകൾ,ദിശ സൂചിക ബോർഡുകൾ,ക്രാഷ് ബാരിയർ,റോഡ് സ്റ്റഡ്‌സ്
-പൂർത്തിയാക്കാൻ 6 മാസം