തിരുവല്ല: തിരുവല്ലയിലെ 66 കെ.വി. സബ് സ്റ്റേഷൻ 110 കെ.വി. സബ് സ്റ്റേഷനാകുന്നു. 2.95 കോടി രൂപയുടെ നിർമ്മാണ പ്രവർത്തനങ്ങൾ പൂർത്തീകരിച്ചു കഴിഞ്ഞതായി മാത്യു ടി. തോമസ് എം.എൽ.എ അറിയിച്ചു. പ്രവർത്തന ഉദ്ഘാടനം ഒക്‌ടോബർ അഞ്ചിന് രാവിലെ 11 ന് മന്ത്രി എം.എം. മണിയുടെ അദ്ധ്യക്ഷതയിൽ മുഖ്യമന്ത്രി പിണറായി വിജയൻ നിർവഹിക്കും.
വൈദ്യുതി മേഖലയിൽ വോൾട്ടേജ് ക്ഷാമം പരിഹരിക്കുക പ്രസരണ, വിതരണ നഷ്ടം കുറയ്ക്കുക, ഉപയോക്താക്കൾക്ക് വൈദ്യുതി ആവശ്യാനുസരണം ലഭ്യമാക്കുക എന്നിവയാണ് ലക്ഷ്യം.

നിലവിൽ മഞ്ഞാടിക്കു സമീപത്തു കൂടി കടന്നുപോകുന്ന മല്ലപ്പള്ളി ചെങ്ങന്നൂർ 110 കെ.വി. ലൈനിൽ നിന്ന് 415 മീറ്റർ 110 കെ.വി. ഭൂഗർഭ കേബിൾ എച്ച്ഡി.ഡി( ഹോറിസോണ്ടൽ ഡയറക്ട് ഡ്രില്ലിംഗ് മെതേഡ്) ഉപയോഗിച്ച് കോഴഞ്ചേരി തിരുവല്ല റോഡിലൂടെ തിരുവല്ല സബ് സ്റ്റേഷനിൽ എത്തിക്കും. തുടർന്ന് അനുബന്ധ ഉപകരണങ്ങൾ സ്ഥാപിച്ച് തിരുവല്ല സബ്‌സ്റ്റേഷനെ 110 കെ.വി. നിലവാരത്തിലേക്ക് ഉയർത്തുന്നതാണ് പദ്ധതി. ഇതിലൂടെ തിരുവല്ല സബ് സ്റ്റേഷന്റെ ശേഷി വർദ്ധിക്കും.