സിംഹക്കടുവയെക്കുറിച്ച് ചിലരെങ്കിലും ആദ്യമായാവും കേട്ടിരിക്കുക. യഥാർത്ഥത്തിൽ സിംഹക്കടുവ അഥവാ Liger എന്നൊരു ജീവി വർഗമുണ്ട്. പേര് സൂചിപ്പിക്കും പോലെ ആൺസിംഹവും പെൺ കടുവയും ഇണചേർന്ന് ഉണ്ടാകുന്ന സങ്കരയിനം ജീവിയാണ് സിംഹക്കടുവ. എണ്ണത്തിൽ തീരെ കുറവാണെങ്കിലും സിംഹക്കടുവ ശരിക്കും ഇപ്പോൾ ലോകത്തുള്ള ഒരു മാർജാര വർഗമാണ്. പഠനങ്ങൾ അനുസരിച്ച് ഒരു പക്ഷേ, പൂച്ച മുതൽ പുലികൾ വരെ ഉൾപ്പെടുന്ന മാർജാര വർഗത്തിലെ ഏറ്റവും വലിയ മൃഗം ആണ് സിംഹക്കടുവ. നേച്ചർ ഈസ് ലിറ്റ് എന്ന് പേരുള്ള ഒരു ട്വിറ്റർ പേജ് അടുത്തിടെ സിംഹക്കടുവയുടെ ഒരു പഴയ വീഡിയോ പോസ്റ്റ് ചെയ്തിരുന്നു. പഴയ വീഡിയോ ആണെങ്കിലും അപൂർവമായി മാത്രം കാണാവുന്ന ഒരു ജീവി ആയതുകൊണ്ട് തന്നെ വീഡിയോ പെട്ടെന്ന് വൈറൽ ആയി. "ഒരു പുരുഷ സിംഹത്തിനും പെൺ കടുവയ്ക്കും ജനിക്കുന്ന സങ്കരയിനം സന്തതിയാണ് സിംഹക്കടുവ" എന്ന തലക്കെട്ടോടെ നേച്ചർ ഈസ് ലിറ്റ് പോസ്റ്റ് ചെയ്ത 30 സെക്കന്റ് മാത്രം ദൈർഘ്യമുള്ള വീഡിയോയിലെ സിംഹക്കടുവ മനുഷ്യരോട് ഇണങ്ങിയതാണ്. ഒരു വീട്ടുമുറ്റത്ത് വെറുതെ നടക്കുന്ന സിംഹക്കടുവയാണ് വിഡിയോയിൽ. പക്ഷേ, ശരീരത്തിന്റെ വലിപ്പവും, കൂടെ നടക്കുന്ന വ്യക്തി സിംഹക്കടുവയെ തലോടുന്നതും അത്ഭുതവും ഒരല്പം ഭയവും കാഴ്ചക്കാരിൽ ഉളവാക്കും.

ആൺസിംഹവും പെൺ കടുവയും ഇണചേർന്ന് ഉണ്ടാകുന്ന സിംഹക്കടുവകൾക്ക് യഥാർത്ഥത്തിൽ ഇവ രണ്ടിനേക്കാൾ വലിപ്പം വയ്ക്കും. പക്ഷേ, ഇവയ്ക്ക് ഇത്രയും വലിയ ശരീരം താങ്ങാൻ വലിപ്പമുള്ള കാലുകൾ പലപ്പോഴും ലഭിക്കാറില്ല. അത് കൊണ്ടുതന്നെ ചീറിപ്പായുന്ന സിംഹത്തിനും പുലിയ്ക്കും വിപരീതമായി സിംഹക്കടുവകൾക്ക് വേഗത്തിൽ സഞ്ചരിക്കാൻ ബുദ്ധിമുട്ടാണ്.