 കൊല്ലത്ത് 1,​011 കുടുംബങ്ങൾക്ക് പട്ടയം ലഭിച്ചു

കൊല്ലം: സർക്കാർ കാലാവധി പൂർത്തിയാക്കുന്നതിന് മുമ്പ് രണ്ടുലക്ഷം പട്ടയങ്ങൾ വിതരണം ചെയ്യുമെന്ന് മന്ത്രി ഇ.ചന്ദ്രശേഖരൻ പറഞ്ഞു. ജില്ലാ തല പട്ടയ മേളയുടെ ഉദ്ഘാടനം ഓൺലൈനിലൂടെ നിർവഹിക്കുകയായിരുന്നു അദ്ദേഹം. 1. 5 ലക്ഷം പട്ടയങ്ങൾ കൊടുത്തുകഴിഞ്ഞതായും അദ്ദേഹം പറഞ്ഞു. ജില്ലയിലെ ആറ് താലൂക്കുകളിലെ പട്ടയങ്ങളാണ് ഇന്നലെ വിതരണം ചെയ്‌തത്. കൊല്ലത്ത് 1,​011 കുടുംബങ്ങൾക്കാണ് പട്ടയം ലഭിച്ചത്.
കൊല്ലം താലൂക്കിലെ പട്ടയ വിതരണം മന്ത്രി.ജെ. മേഴ്‌സിക്കുട്ടിഅമ്മയും പുനലൂരിൽ മന്ത്രി കെ. രാജുവും നിർവഹിച്ചു. കൊട്ടാരക്കരയിൽ മുല്ലക്കര രത്‌നാകരൻ, കരുനാഗപ്പള്ളിയിൽ ആർ. രാമചന്ദ്രൻ,​ കുന്നത്തൂരിൽ കോവൂർ കുഞ്ഞുമോൻ എന്നീ എം.എൽ.എമാർ ഉദ്ഘാടനം നിർവഹിച്ചു.

കൊല്ലത്തെ ചടങ്ങിൽ എൻ.കെ. പ്രേമചന്ദ്രൻ എം.പി, എം.എൽ.എമാരായ എം. നൗഷാദ്, എം. മുകേഷ്, ജില്ലാ കളക്ടർ ബി.അബ്ദുൽ നാസർ തുടങ്ങിയവർ പങ്കെടുത്തു.