ഭക്ഷണം ഓർഡർ ചെയ്താൽ ഭക്ഷണം മാത്രമല്ല അൽപം മസിൽ പ്രകടനം കാണാനും അവസരം കിട്ടിയാലോ?​ ജപ്പാനിലാണ് ഈ കാഴ്ച. കൊവിഡ് പ്രതിസന്ധിക്കാലത്ത് ബിസിനസിന് ഡിമാൻഡ് കൂട്ടാൻ ഓൺലൈൻ ഭക്ഷണ ഡെലിവറിക്കായി ഷർട്ട് ധരിക്കാത്ത ബോഡി ബിൽഡർമാരെ ഏർപ്പെടുത്തിയിരിക്കുകയാണ് ജപ്പാനിലെ ഒരു സുഷി റെസ്റ്റോറന്റ് . 'ഡെലിവറി മാക്കോ' എന്ന് പേരിട്ടിരിക്കുന്ന ഭക്ഷണശാലയുടെ നടത്തിപ്പുകാരൻ ഒരു ബോഡിബിൽഡർ ആണെന്നതാണ് പ്രത്യേകത. ജപ്പാനിലെ അഞ്ചോയിൽ ഉള്ള അറുപതു വർഷത്തെ പാരമ്പര്യമുള്ള സുഷി റെസ്റ്റോറന്റ് ആയ 'ഇമാസുഷി'യുടെ ഉടമ മസാനോറി സുഗ്യൂറ പരീക്ഷിച്ച തന്ത്രം അതിന്റെ പുതുമ കാരണം മാദ്ധ്യമങ്ങളിൽ ഇടം പിടിച്ചിരിക്കുകയാണ്.

പത്തുലക്ഷം ഡോളറിന്റെ കച്ചവടം നടക്കുന്ന ഇമാസുഷിയിൽ കൊവിഡ് കാലത്ത് വൻ ഇടിവു സംഭവിച്ചു. തുടർന്നാണ് പുതിയ ആശയം രൂപീകരിച്ചത്. ഓൺലൈൻ ഓർഡറുകളുടെ ഹോം ഡെലിവെറിക്കായി അദ്ദേഹം നേരിട്ട് അഭിമുഖം നടത്തി അരഡസൻ ബോഡി ബിൽഡർമാരെ നിയമിച്ചു. അതോടെ, സ്വാദിഷ്ടമായ സുഷി വിഭവങ്ങൾ വീട്ടിലെത്തുന്നതോടൊപ്പം കസ്റ്റമേഴ്സിന് സൗജന്യമായി ബോഡി ഷോയും കാണാം.

വീട്ടുവാതിൽക്കൽ ചെന്ന് മുട്ടുന്ന ബിൽഡർമാർ ഭക്ഷണം കസ്റ്റമറുടെ കൈയ്യിൽ കൊടുക്കും. തുടർന്ന് തങ്ങൾ ഓഫർ ചെയ്യുന്ന അധിക സേവനത്തെക്കുറിച്ച് അവരോട് പറയും. അവരുടെ സമ്മതത്തോടെ മേൽവസ്ത്രം ഊരി തങ്ങളുടെ കമനീയമായ ശരീരസൗന്ദര്യം പല പോസുകളിൽ നിന്ന് അവർക്കു മുന്നിൽ പ്രദർശിപ്പിക്കും. . പക്ഷേ, മാക്കോ പടയുടെ സേവനം ലഭ്യമാകണമെങ്കിൽ കുറഞ്ഞത് 7000 യെന്നിന്റെ (ഏകദേശം 4826 രൂപ) ഓർഡർ നൽകണമെന്നു മാത്രം.