ചൈനയിലെ വിൻഡോ ഒഫ് വേൾഡ് എന്ന അമ്യൂസ്‌മെന്റ് പാർക്കിലെ റൈഡിനെ കുറിച്ച് പറഞ്ഞാൽ ആരും വിശ്വസിക്കണമെന്നില്ല. പേര് 'സമാധി: 4ഡി എക്സ്‌‌പീരിയൻസ് ഓഫ് ഡെത്ത്'. ആളുകൾക്ക് മരണം, ശരീരം ദഹിപ്പിക്കൽ, പുനരുജ്ജീവനം എന്നിവയുടെ ഒരു റിയൽലൈഫ് അനുഭവം നൽകുകയാണ് ഈ റൈഡ് കൊണ്ട് ലക്ഷ്യം വയ്ക്കുന്നത്. ഉള്ളിൽ പ്രവേശിക്കുന്നവരെ ഒരു മൃതശരീരം കൊണ്ടുപോകുന്നതുപോലെ ആദ്യം ഒരു മോർച്ചറിയിലൂടെ കൊണ്ടുപോകും. പിന്നീട് ദഹിപ്പിക്കുന്നതിനായി ഒരു കൺവെയർ ബെൽറ്റിൽ കിടത്തും. ഇലക്ട്രിക് ശ്മശാനത്തിൽ ദഹിപ്പിക്കുന്ന അനുഭവം കിട്ടാൻ ചൂട് വായു 105 ഫാരൻഹീറ്റ് താപനിലയിൽ കടത്തിവിടും. തീയുടെ പ്രതീതി ജനിപ്പിക്കാൻ പ്രത്യേക ലൈറ്റ് സംവിധാനങ്ങളുമുണ്ട്. ഈ ഘട്ടം കഴിഞ്ഞ് ആളുകൾ ഇഴഞ്ഞ് ഒരു ചെറിയ വാതിലിനടുത്തേയ്ക്ക് നീങ്ങണം. അതിലൂടെ പുറത്ത് കടക്കുന്നതോടെ സംഗതി തീർന്നു. ഏറെ ജനപ്രീതിയുള്ള ഈ റൈഡ് ഒന്നുപരീക്ഷിക്കാൻ ആളുകളുടെ വൻ തിരക്കാണ്.

വെറുതെ ഇത്തിരി ചൂട് കടത്തി വിട്ടു ഉണ്ടാക്കിയ ചെറിയ സെറ്റപ്പൊന്നുമല്ല കേട്ടോ. ഒരുപാട് ഗവേഷണങ്ങളും പരീക്ഷണങ്ങളും നടത്തിയാണ് ഇത് ഉണ്ടാക്കിയിരിക്കുന്നത്. ഏറ്റവും സ്വാഭാവികം ആക്കുവാൻ വേണ്ടി ശരിക്കും ഒരു ഇലക്ട്രിക് ശ്മശാനത്തിനുള്ളിലൂടെ കടന്നു നോക്കുകയും ചെയ്തു ഇതിന്റെ നിർമാതാക്കൾ.