കൊട്ടിയം: ബൈപാസ് റോഡിൽ നിയന്ത്രണം വിട്ടകാർ റോഡരികിലെ സംരക്ഷണ തൂണുകൾ ഇടിച്ചു തകർത്ത ശേഷം റോഡിന് താഴെയുള്ള പതിനൊന്നു കെ.വി വൈദ്യുതി തൂണുകൾക്കിടയിലേക്ക് ഇടിച്ചു കയറി ഡ്രൈവർക്ക് പരിക്കേറ്റു. അപകടത്തിൽ വൈദ്യുതി കമ്പികൾ പൊട്ടിയെങ്കിലും വലിയ ദുരന്തം ഒഴിവായി. ശനിയാഴ്ച അർദ്ധരാത്രി പന്ത്രണ്ടരയോടെ പാലത്തറയിലാണ് സംഭവം. വലിയ ശബ്ദം കേട്ട് പരിസരവാസികൾ ഇറങ്ങി നോക്കിയപ്പോഴാണ് കാർ വൈദ്യുതി തൂണുകൾക്കിടയിൽ ഇടിച്ചു കയറിയത് ശ്രദ്ധയിൽപ്പെട്ടത്. ഓടിക്കൂടിയ നാട്ടുകാർ കാറിനുള്ളിൽ കുടുങ്ങിയ ഡ്രൈവറെ പുറത്തെടുത്ത് അടുത്തുള്ള സ്വകാര്യ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.