 ഉയർന്ന പ്രതിദിന റെക്കാഡ്

കൊല്ലം: ജില്ലയിൽ ഇന്നലെ 812 പേർക്ക് കൊവിഡ് സ്ഥിരീകരിച്ചു. ജില്ലയിൽ ഒരു ദിവസം സ്ഥിരീകരിക്കുന്ന ഏറ്റവും ഉയർന്ന പോസിറ്റീവ് കേസുകളുടെ എണ്ണമാണിത്. കഴിഞ്ഞ ദിവസങ്ങളിൽ കൊവിഡ് സ്ഥിരീകരിച്ചവരുടെ പ്രാഥമിക സമ്പർക്ക പട്ടികയിൽ ഉൾപ്പെട്ടവരെ പരിശോധനയ്ക്ക് വിധേയമാക്കുമ്പോൾ വൈകാതെ പ്രതിദിന കൊവിഡ് സ്ഥിരീകരണം ജില്ലയിൽ ആയിരം കടക്കാൻ സാദ്ധ്യതയുണ്ട്.

ഇന്നലെ കൊവിഡ് സ്ഥിരീകരിച്ചവരിൽ ഒരാൾ വിദേശത്ത് നിന്നും രണ്ടുപേർ ഇതര സംസ്ഥാനത്ത് നിന്നും വന്നവരാണ്. നാല് ആരോഗ്യ പ്രവർത്തകർ ഉൾപ്പടെ 8,099 പേർ സമ്പർക്കത്തിലൂടെയാണ് രോഗബാധിതരായത്. ഇന്നലെ 295 പേർ രോഗമുക്തരായി. ഇതോടെ ജില്ലയിൽ കൊവിഡ് ചികിത്സയിലുള്ളവരുടെ എണ്ണം 5,870 ആയി. ജില്ലയിൽ ഇതുവരെ കൊവിഡ് സ്ഥിരീകരിച്ചവരുടെ എണ്ണം ഇന്നലെ 14,000 കടന്നു. 14,083 പേർക്കാണ് ജില്ലയിൽ ഇതുവരെ കൊവിഡ് ബാധിതരായത്.

 ഉയർന്ന കൊവിഡ് പോസിറ്റീവ് ദിനങ്ങൾ

ഇന്നലെ: 812

സെപ്തംബർ 27: 690

സെപ്തംബർ 26: 589

സെപ്തംബർ 25: 569

സെപ്തംബർ 23: 503

 ആകെ രോഗം ബാധിച്ചവർ: 14,083

 കൊവിഡ് മരണം: 52

ജില്ലയിൽ കൊവിഡ് ബാധിച്ച് മരിച്ചവരുടെ ഔദ്യോഗിക കണക്ക് പ്രകാരം 52 ആയി. കൊവിഡ് ചികിത്സയിലിരിക്കെ കഴിഞ്ഞ ഒരാഴ്ചയ്ക്കിടെ മരിച്ച പലരുടെയും അന്തിമ പരിശോധനാ ഫലം ഇനിയും വരാനുണ്ട്. കൊവിഡ് മരണക്കണക്കിൽ ജില്ല നിലവിൽ അഞ്ചാം സ്ഥാനത്താണ്. സംസ്ഥാനത്ത് ഇതുവരെ 719 പേരാണ് കൊവിഡ് ബാധിച്ച് മരിച്ചതായി സ്ഥിരീകരിച്ചിട്ടുള്ളത്. സംസ്ഥാനത്തെ പൊതുവായ സ്ഥിതി പോലെ മദ്ധ്യവയസ് പിന്നിട്ടവരാണ് കൊവിഡിന് കീഴടങ്ങി മരിച്ചവരിൽ ഭൂരിഭാഗവും.