ചാലക്കുടി: തൃശൂർ ജില്ലാ പഞ്ചായത്തിന്റെ ജലരക്ഷ ജീവരക്ഷ പദ്ധതിയിൽ ഉൾപ്പെടുത്തി നിർമ്മിക്കുന്ന കട്ടപ്പുറം ലിഫ്ട് ഇറിഗേഷന്റെ പുതിയ പമ്പ് ഹൗസ് ശിലാസ്ഥാപനം ജില്ലാ പഞ്ചായത്ത് അംഗം അഡ്വ. കെ.ആർ. സുമേഷ് നിർവഹിച്ചു. ചാലക്കുടി ബ്ലോക്ക് പഞ്ചായത്ത് സ്ഥിരം സമിതി അദ്ധ്യക്ഷ ലീല സുബ്രഹ്മണ്യൻ അദ്ധ്യക്ഷയായി.

ചാലക്കുടി നിയോജക മണ്ഢലത്തിലെ ഏറ്റവും വലിയ ലിഫ്ട് ഇറിഗേഷൻ പദ്ധതികളിൽ ഒന്നായ കട്ടപ്പുറം ലിഫ്ട് ഇറിഗേഷന്റെ പഴയ പമ്പ് ഹൗസ് കഴിഞ്ഞ പ്രളയകാലത്ത് പൂർണണമായും മുങ്ങി ജീർണ്ണാവസ്ഥയിലായിരുന്നു. കൊരട്ടി പഞ്ചായത്തിലെ വാർഡുകളിൽ 545 ഹെക്ടറുകളിൽ സമൃദ്ധിയായി ജലം എത്തിക്കുന്ന ലിഫ്ട് ഇറിഗേഷൻ 1980ൽ ആണ് തുടക്കം കുറിച്ചത്.

പമ്പ് ഹൗസ് നിർമ്മാണത്തിന് പുറമെ കുളം കെട്ടി സംരക്ഷിക്കാൻ 15 ലക്ഷം രൂപ ഇറിഗേഷൻ അനുവദിച്ചിട്ടുണ്ട്. വാർഡ് മെമ്പർ ബിന്ദു കുമാരൻ, ജേക്കബ് മാസ്റ്റർ, എം.എ. രാമകൃഷ്ണൻ, പി.സി. ബിജു, എം.ആർ. രവീന്ദ്രൻ എന്നിവർ സംസാരിച്ചു.