തൃശൂർ: തദ്ദേശ സ്വയം ഭരണ സ്ഥാപനങ്ങൾക്ക് വാർഡ് തലത്തിൽ മാലിന്യ സംസ്‌കരണ കേന്ദ്രം വേണമെന്ന് മന്ത്രി എ.സി. മൊയ്തീൻ. കുന്നംകുളം നഗരസഭാ ഹെർബർട്ട് റോഡ് നിർമാണോദ്ഘാടനവും നഗരസഭാ ശുചിത്വ പദവി പ്രഖ്യാപനവും വികസന രേഖ പ്രകാശനവും നിർവഹിക്കുകയായിരുന്നു മന്ത്രി.
എല്ലാ വാർഡുകളിലും മാലിന്യം സംസ്‌കരിക്കാൻ ഒരു സ്ഥലം കണ്ടെത്തേണ്ടത് ജനപ്രതിനിധിയുടെ ചുമതലയാണ്. മാലിന്യ സംസ്‌കരണം തന്റെ വാർഡിൽ പാടില്ലെന്ന് തിരഞ്ഞെടുക്കപ്പെട്ട ഒരു ജനപ്രതിനിധിയും തീരുമാനിക്കരുത്. ഇത്തരം ആക്ഷേപങ്ങൾ സർക്കാരിന്റെ ശ്രദ്ധയിൽപ്പെട്ടിട്ടുണ്ട്. ഉത്പാദിപ്പിക്കുന്ന മാലിന്യം ഓരോരുത്തർക്കും സംസ്‌കരിക്കാൻ ഉത്തരവാദിത്വമുണ്ടെന്നും മന്ത്രി വ്യക്തമാക്കി.
നടൻ വി.കെ. ശ്രീരാമൻ മുഖ്യാതിഥിയായി. നഗരസഭാ ചെയർപേഴ്‌സൺ സീത രവീന്ദ്രൻ അദ്ധ്യക്ഷയായി. വൈസ് ചെയർമാൻ പി.എം. സുരേഷ്, സ്ഥിരം സമിതി അദ്ധ്യക്ഷന്മാർ തുടങ്ങിയവർ പങ്കെടുത്തു.