കൊടുങ്ങല്ലൂർ: ടൂറിസം വികസനത്തിന് പുത്തൻ ഉണർവേകാൻ കൊടുങ്ങല്ലൂരിൽ കയാക്കിംഗ് സെന്റർ വരുന്നു. നഗരസഭയുടെ കാവിൽക്കടവിലെ വി.കെ രാജൻ മെമ്മോറിയൽ പാർക്ക് കൂടുതൽ ആകർഷകമാക്കുന്നതിനും ജനോപകാരപ്രദമാക്കുന്നതിനുമാണ് മുസിരിസ് പൈതൃക പദ്ധതിയുടെ സഹകരണത്തോടെ കയാക്കിംഗ് സെന്റർ നഗരസഭ ആരംഭിക്കുന്നത്. ഇതുമായി ബന്ധപ്പെട്ട പദ്ധതി തയ്യാറാക്കി മുസിരിസുമായി നഗരസഭ കരാർ ഒപ്പിടുമെന്ന് ചെയർമാൻ കെ.ആർ ജൈത്രൻ പറഞ്ഞു.

കുട്ടികൾക്കും മുതിർന്നവർക്കും കയാക്കിംഗ് നടത്തുന്നതിനും കയാക്കിംഗ് പരിശീലനത്തിനുമായാണ് സ്ഥാപനം ആരംഭിക്കുന്നത്. വിനോദ സഞ്ചാരത്തിനായി ബോട്ട് സർവീസുകളും ഇതിനൊപ്പം ആരംഭിക്കാൻ പദ്ധതിയുണ്ട്. പദ്ധതിയുടെ നടത്തിപ്പ് ചുമതല പൂർണ്ണമായും മുസിരിസ് പൈതൃക പദ്ധതിക്കായിരിക്കും.

കനോലികനാലിന്റെ തീരത്തുള്ള വി.കെ രാജൻ മെമ്മോറിയൽ പാർക്ക് 35 ലക്ഷം രൂപ ചെലവഴിച്ച് വിവിധ നവീകരണ പ്രവർത്തനങ്ങൾ നടത്തിയാണ് പുനർനിർമ്മിച്ച് തുറന്നു കൊടുത്തത്. നഗരസഭയുടെ 72 സെന്റ് സ്ഥലത്ത് 2003 ഒക്ടോബർ അഞ്ചിന് ഉദ്ഘാടനം കഴിഞ്ഞ പാർക്ക് 2013ൽ വി.കെ രാജൻ സ്മാരക പാർക്കായി നാമകരണം ചെയ്തു. മുൻ മുഖ്യമന്ത്രി പി.കെ വാസുദേവൻ നായരാണ് പാർക്കിന്റെ ഉദ്ഘാടനം നിർവ്വഹിച്ചത്.