ഗുരുവായൂർ: പൊതുകിണറുകൾ സംരക്ഷിക്കുകയെന്നത് അടുത്ത തലമുറയോട് ചെയ്യുന്ന നീതിയാണെന്ന് ചീഫ് വിപ്പ് കെ. രാജൻ. ഗുരുവായൂർ ഇരിങ്ങപ്പുറത്ത് നവീകരിച്ച വന്നേരി കിണറിന്റെ ഉദ്ഘാടനം നിർവഹിക്കുകയായിരുന്നു അദ്ദേഹം. ഒരു കാലത്ത് നാടിന്റെ പൊതുയിടങ്ങളായിരുന്നു കിണറ്റിൻ കരകളെന്നും അദ്ദേഹം പറഞ്ഞു. കെ.വി. അബ്ദുൾ ഖാദർ എം.എൽ.എ അദ്ധ്യക്ഷനായി. നഗരസഭാദ്ധ്യക്ഷ എം. രതി മുഖ്യാതിഥിയായി. കിണർ നവീകരണത്തിന് സി.എസ്.ആർ ഫണ്ട് അനുവദിച്ച കാനറ ബാങ്ക് മാനേജർ പി.കെ. അവിനാശ്, നിർമാണത്തിന് നേതൃത്വം നൽകിയ ഹൈമ ഹോം ഡെക്കറിന്റെ എം.ഡി: അജിത് മോഹൻ എന്നിവർക്ക് ചീഫ് വിപ്പ് ഉപഹാരം നൽകി. വാർഡ് കൗൺസിലറും നഗരസഭാ വൈസ് ചെയർമാനുമായ അഭിലാഷ് വി. ചന്ദ്രൻ, സ്റ്റാൻഡിംഗ് കമ്മിറ്റി ചെയർമാൻ ടി.എസ്. ഷെനിൽ, പ്രസ് ഫോറം പ്രസിഡന്റ് ലിജിത്ത് തരകൻ, ആർ. ജയകുമാർ, എ.ഡി. പോൾ എന്നിവർ സംസാരിച്ചു.