രാവിലെ എഴുന്നേറ്റാലുടൻ ഒരു ചൂടുചായ കുടിക്കാത്ത മലയാളികൾ നന്നേ കുറവാണ്. ചായക്ക് പകരം കാപ്പിയോ കട്ടനോ ആകുമെന്ന വ്യത്യാസം ചിലർക്കുണ്ട്. പത്ത് മണിയാകും പ്രഭാതഭക്ഷണം എന്നതിനാൽ അതുവരെ വിശക്കാതിരിക്കാൻ, ഉന്മേഷം ഉണ്ടാകാൻ, പ്രഭാതകൃത്യങ്ങൾ സുഗമമായി നടക്കാൻ, മരുന്ന് കഴിക്കാൻ, ഉഷാറാകാൻ, പത്രം ഇടുന്നവർക്കും കറവക്കാരനും കൃഷിക്കാരനും പ്രാർത്ഥനയ്ക്ക് പോകുന്നവർക്കും ഒരു ഇടക്കാല ആശ്വാസം കിട്ടാൻ, തണുപ്പകറ്റി ഒന്ന് ചൂടാവാൻ......എന്നിങ്ങനെ ഒരു ചൂടുചായയ്ക്ക് പിന്നിൽ ഒരുപാടുകാരണങ്ങളുണ്ട്.

എന്നാൽ ഇവർ തന്നെയാണ് വയറെരിച്ചിൽ, നെഞ്ചരിച്ചിൽ, ഗ്യാസ്, വിശപ്പില്ലായ്മ, മലശോധനകുറവ്, പുളിച്ചുതികട്ടൽ, വയറുവേദന, അസിഡിറ്റി, അൾസർ എന്നൊക്കെ പറഞ്ഞു ഡോക്ടർമാരെ സമീപിക്കുന്നതും. ദീർഘകാലം മരുന്ന് കഴിച്ചാലും മരുന്നൊന്ന് മുടങ്ങിപ്പോയാൽ ഇവയെല്ലാം കൂടുതൽ ശക്തിയോടെ തിരിച്ചു വരുന്നതും കാണാം. ചിലരുടെ വയറിലെ പ്രശ്നങ്ങൾ കാരണം ശരിയായ മരുന്നു പോലും കഴിക്കാൻ സാധിക്കില്ല.

ചിലർക്ക് രാവിലെതന്നെ ചായയോടൊപ്പം ഒരു കടി കൂടി വേണം. ബിസ്കറ്റ്, ബ്രഡ് ,കേക്ക്, അരിപത്തൽ ,കലത്തപ്പം, എണ്ണപ്പലഹാരങ്ങൾ..... അങ്ങനെ നീളും ആ ലിസ്റ്റ്.

എന്നാൽ നല്ലൊരു ദിനചര്യയുള്ളവർക്ക് ഇതൊന്നും പാടില്ലെന്ന് ആയുർവേദക്കാർ നിരന്തരം പറയുന്നുമുണ്ട്. രാവിലെ പ്രഭാതകൃത്യങ്ങൾ നിർവ്വഹിച്ച് എത്രയും നേരത്തെ പല്ലുതേച്ച് വെറുംവയറ്റിൽ തന്നെ കുളിച്ചാൽ ആരോഗ്യസംരക്ഷണത്തിന്റെ പകുതിയായി എന്നുതന്നെ പറയാം.

വയറിൽ തുടങ്ങുന്ന ദഹനപ്രശ്നങ്ങൾ പിന്നീട് നിരവധി രോഗങ്ങൾക്ക് കാരണമാകാം. അതിനാൽ രാവിലെ വെറുംവയറ്റിൽ ചായ കുടിക്കുന്ന ശീലം ഒഴിവാക്കിയാൽ തന്നെ നിരവധി രോഗങ്ങളിൽ നിന്ന് മുക്തി നേടാം.ആജീവനാന്തം മരുന്ന് കഴിക്കേണ്ട സാഹചര്യവും ഒഴിവാക്കാം.
ശുദ്ധജലമോ ചൂടാറിയ വെള്ളമോ കുടിക്കുന്നതിൽ ദോഷമില്ല. ചായ കുടിച്ചെ പറ്റൂ എന്നുള്ളവർ ചൂടാറ്റിയ ചായ കുളികഴിഞ്ഞ് പ്രഭാതഭക്ഷണത്തിന്റെ കൂടെ മാത്രം കഴിക്കുക. എന്തുതന്നെയായാലും വെറും വയറ്റിൽ ചൂട് ചായ അരുത്. അങ്ങിനെ ആകുമ്പോൾ പലതവണ ചായ കുടിക്കുന്നവരുടെ കാര്യം പറയേണ്ടതില്ലല്ലോ?