ശ്രീനാഥ് ഭാസിയും ബാലു വർഗീസും പ്രധാന കഥാപാത്രങ്ങളെ അവതരിപ്പിക്കുന്ന ചിത്രം സുമേഷ് & രമേഷ് റിലീസിനൊരുങ്ങുന്നു. ചിത്രം സെപ്തംബർ 17ന് ഒ.ടി.ടി പ്ലാറ്റ്‌ഫോമായ പ്രൈം റീൽസിൽ റിലീസ് ചെയ്യും. സനൂപ് തൈക്കുടമാണ് ചിത്രം സംവിധാനം ചെയ്യുന്നത്. ഫരീദ് ഖാൻ ആണ് ചിത്രത്തിന്റെ പ്രൊഡ്യൂസർ. ജോസഫ് വിജീഷ്, സനൂപ് തൈക്കുടം എന്നിവരാണ് രചന നിർവഹിച്ചിരിക്കുന്നത്. കൊവിഡ് 19ന്റെ പശ്ചാത്തലത്തിൽ തിയേറ്ററുകൾ അടച്ചിട്ട സാഹചര്യത്തിലാണ് സിനിമകൾ ഒ.ടി.ടി പ്ലാറ്റ്‌ഫോം വഴി റിലീസ് ചെയ്ത് തുടങ്ങിയത്. മലയാളത്തിൽ ആദ്യമായി ഒ.ടി.ടി പ്ലാറ്റ്‌ഫോം വഴി റിലീസ് ചെയ്ത ചിത്രം സൂഫിയും സുജാതയുമാണ്. നരണിപ്പുഴ ഷാനവാസിന്റെ സംവിധാനത്തിലൊരുങ്ങിയ ചിത്രം ആമസോൺ പ്രൈമിലാണ് റിലീസ് ചെയ്തത്. മറ്റൊരു ഒ.ടി.ടി പ്ലാറ്റ്‌ഫോമായ നെറ്റ്ഫ്ളിക്ക്സിൽ ഡയറക്ട് റിലീസ് ചെയ്ത ആദ്യ മലയാള സിനിമ മണിയറയിലെ അശോകൻ ആയിരുന്നു. തിരുവോണ ദിനത്തിലായിരുന്നു ചിത്രം ഓൺലൈനിൽ റിലീസ് ചെയ്തത്. വേഫറെർ ഫിലിംസിന്റെ ബാനറിൽ ദുൽഖർ സൽമാനും ജേക്കബ് ഗ്രിഗറിയും ചേർന്ന് നിർമ്മിച്ച സിനിമ സംവിധാനം ചെയ്തിരിക്കുന്നത് നവാഗതനായ ഷംസു സെയ്ബയാണ്.റിലീസ് ചെയ്ത് രണ്ട് ദിവസം പിന്നിടുമ്പോൾ നെറ്റ്ഫ്ളിക്സിന്റെ ട്രെന്റിംഗ് ലിസ്റ്റിൽ ഇടംപിടിച്ചിരിക്കുകയാണ് ചിത്രം. ഇന്ത്യയ്ക്ക് പുറമെ യു.എ.യിലും ട്രെന്റിംഗ് ലിസ്റ്റിൽ ഒന്നാം സ്ഥാനത്ത് മണിയറയിലെ അശോകൻ ഉണ്ട്.