തിരുവനന്തപുരം: സംസ്ഥാനത്ത് ഇന്നും നാളെയും മഴയ്ക്ക് സാദ്ധ്യത. രണ്ടു ദിവസത്തേക്ക് തെക്കൻ ജില്ലകളിലാണ് മറ്റു ജില്ലകളെ അപേക്ഷിച്ച് കൂടുതൽ മഴയ്ക്ക് സാദ്ധ്യത. തെക്കൻ കേരളത്തിലെ കിഴക്കൻ മലയോരത്ത് ഇടിയോടുകൂടിയ മഴ പ്രതീക്ഷിക്കാം. എറണാകുളം,ഇടുക്കി,ആലപ്പുഴ,പത്തനംതിട്ട,കോട്ടയം,കൊല്ലം,തിരുവനന്തപുരം ജില്ലകളിൽ മഴയ്ക്ക് സാദ്ധ്യതയുണ്ട്. മദ്ധ്യ,വടക്കൻ ജില്ലകളിലും ഒറ്റപ്പെട്ട പ്രദേശങ്ങളിൽ മഴ ലഭിക്കും. ഇന്ന് കൊല്ലം,ആലപ്പുഴ ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്.
കഴിഞ്ഞ ദിവസം വടക്കൻ കേരളത്തിനും കർണാടകയ്ക്കും ഇടയിൽ രൂപപ്പെട്ട ചക്രവാതച്ചുഴി ദുർബലപ്പെട്ട് പടിഞ്ഞാറേക്ക് നീങ്ങുന്നതും തെക്കൻ കേരളത്തിലും തമിഴ്‌നാട്ടിലും മഴയ്ക്ക് കാരണമാകുമെന്നാണ് നിരീക്ഷണം. നാളെ മഴ കൂടുതൽ ജില്ലകളിലേക്ക് വ്യാപിക്കും. ഇന്നു മുതൽ 9 വരെ കൊല്ലം,ആലപ്പുഴ,കൊച്ചി, പൊന്നാനി,കോഴിക്കോട്,കണ്ണൂർ,കാസർകോട് ജില്ലകളിലെ തീര പ്രദേശത്ത് ഉയർന്ന തിരമാലയ്ക്കും കടലാക്രമണത്തിനും സാദ്ധ്യതയുള്ളതിനാൽ തീരദേശവാസികൾ ജാഗ്രത പാലിക്കണം.