ഏറ്റവും നല്ലൊരു ടോണിക്കാണ് തേൻ. അഞ്ച് കിലോ ആപ്പിളിൽ നിന്നോ, ഏഴു കിലോ കാരറ്റിൽ നിന്നോ നാൽപ്പതോളം കോഴിമുട്ടയിൽ നിന്നോ ലഭിക്കുന്ന അത്രയും ഊർജ്ജം ഒരു കിലോഗ്രാം തേനിൽ നിന്ന് ലഭിക്കും. വില കൂടിയ ഒരു ഭക്ഷ്യവസ്തുവും മരുന്നുമാണ് തേൻ. അതിനാൽ നിത്യോപയോഗ ഭക്ഷ്യവസ്തുക്കളിൽ തേൻ കൂടി ഉൾപ്പെടുത്താൻ സാധാരണക്കാരന് കഴിയാറില്ല. എന്നാൽ, അതിനേക്കാൾ വില കൂടുതലുള്ള ടിന്നിലടച്ച പല ഭക്ഷ്യവസ്തുക്കളും ആരോഗ്യത്തിനെ പോഷിപ്പിക്കുന്നില്ലെന്ന യാഥാർത്ഥ്യം മനസ്സിലാക്കിയിട്ടും ഇപ്പോഴും തേനിന്റെ മികവിലേക്ക് നമ്മുടെ ശ്രദ്ധ തിരിഞ്ഞിട്ടില്ല. അതിന്റെ പ്രധാന കാരണം തേനിനെക്കുറിച്ചുള്ള അറിവില്ലായ്മയും അതിൽ ചേർക്കുന്ന മായവും കൂടാതെ കൃത്രിമമായി നിർമ്മിക്കുന്ന തേനുമാണ്. വിശ്വാസയോഗ്യമായ തേൻ ഏതാണെന്ന ചോദ്യം നിലനിൽക്കുന്നുണ്ടെന്ന് സാരം.
ആയുർവേദം, അലോപ്പതി, ഹോമിയോ, യുനാനി ചികിത്സകളിൽ തേൻ ഉപയോഗിക്കുന്നുണ്ട്. പ്രകൃതിചികിത്സയിലെ പ്രധാന മരുന്നാണ് തേൻ. നിരവധി രോഗങ്ങൾക്ക് തേൻ മാത്രമായും മറ്റു പല മരുന്നുകൾക്കൊപ്പവും ഉപയോഗപ്പെടുത്തുന്നുണ്ട്.
നല്ലതേൻ
തിരിച്ചറിയാം
ഏറ്റവും എളുപ്പത്തിൽ തേൻ പരിശോധിക്കുന്നതിന് ഒരു മാർഗ്ഗമുണ്ട്. യഥാർത്ഥ തേൻ ഒരു തുള്ളി ഒരു ഗ്ലാസ്സ് വെള്ളത്തിലേക്ക് ഇറ്റിച്ചാൽ ഒരു ഗോള രൂപത്തിൽ തന്നെ അത് താഴുന്നത് കാണാം. മായംചേർന്ന തേനാണെങ്കിൽ വെള്ളത്തിന്റെ ഉപരിതലത്തിൽ അത് പടർന്നു ലയിക്കുന്നത് കാണാം. നല്ല തേൻ തിരിച്ചറിയാൻ മറ്റ് നിരവധി ഉപാധികളുമുണ്ട്. .
പ്രമേഹരോഗമുള്ളവർ ചെറുതേൻ മാത്രമേ ഉപയോഗിക്കാൻ പാടുള്ളൂ.അതും പ്രമേഹം നിയന്ത്രണ വിധേയമായിരിക്കുമ്പോൾ മതി. തേൻ അടങ്ങിയ ജാമുകൾ മാർക്കറ്റിൽ ലഭിക്കുന്നുണ്ട്.എന്നാൽ, അത് ചൂടുള്ള റൊട്ടിയിലോ ചപ്പാത്തിയിലോ പുരട്ടിയോ മറ്റ് ചൂടുള്ള വസ്തുക്കളോടൊപ്പമോ കഴിക്കാൻ പാടില്ല. ചൂടാറിയവയ്ക്കൊപ്പം കഴിക്കുന്നത് നല്ലതുതന്നെ. ഹൃദയത്തിനും ശ്വാസകോശങ്ങൾക്കും തലച്ചോറിനും ദഹനത്തിനും നല്ലതാണ് തേൻ. കേടുകൂടാതെ ദീർഘനാൾ ഇരിക്കാനുള്ള കഴിവും തേനിന് മാത്രമുള്ളതാണ്.
വിപണിയിൽ നല്ല തേൻ ലഭ്യമാക്കുന്നതിനും ചെറുതേൻ, വൻതേൻ എന്നിവ വേർതിരിച്ച് കൊടുക്കുന്നതിനും സർക്കാരിന്റെ ശ്രദ്ധ പതിയേണ്ടതുണ്ട്. രോഗികളും അല്ലാത്തവരും പ്രത്യേകിച്ച് കുട്ടികൾ തേനിന്റെ ഉപയോഗം വർദ്ധിപ്പിക്കുന്നതിലൂടെ ആരോഗ്യം സംരക്ഷിക്കാം.
പല്ലിന്റെ ബലംകൂട്ടും ശരീര വണ്ണം കുറയ്ക്കും
തേൻ ഉപയോഗപ്പെടുത്താവുന്ന ചില പ്രാഥമിക ചികിത്സകൾ ഇനി പറയാം.
കൂടുതൽ മാർഗ്ഗനിർദ്ദേശങ്ങൾ ഒരു ആയുർവേദ ഡോക്ടറിൽ നിന്ന് തേടാവുന്നതാണ്.
ആസ്ത് മ രോഗികൾ രാത്രി കിടക്കാൻനേരം ഒരു ചെറുനാരങ്ങയുടെ നീരും അത്രയും അളവിൽ തേനും ചേർത്ത് യോജിപ്പിച്ച് ചുക്ക് പൊടിയോടൊപ്പം ഉപയോഗിച്ചാൽ രാത്രിയിലെ ശ്വാസംമുട്ടൽ കുറയും.
കുഞ്ഞുങ്ങൾക്ക് നിറം ലഭിക്കാൻ തേനിൽ പച്ച മഞ്ഞൾ ചേർത്ത് പുരട്ടി കുളിപ്പിക്കുക. പല്ലിന്റെ ബലം വർദ്ധിപ്പിക്കുവാൻ കുട്ടികൾക്ക് തേൻ കൊടുക്കാം
തീ കൊണ്ടോ, നീരാവി കൊണ്ടോ, ചൂട് വെള്ളം വീണോ പൊള്ളലുണ്ടായാൽ തേൻ മാത്രമായോ തേനും നെയ്യും ചേർത്തോ പുരട്ടാം.
പുളിച്ചുതികട്ടലും മലബന്ധവും ശമിപ്പിക്കുവാൻ ഒരു ഗ്ലാസ് ചൂടാക്കിയ വെള്ളത്തിൽ പകുതിചെറുനാരങ്ങയുടെ നീര് ചേർത്ത് ഒരു സ്പൂൺ തേൻ കലർത്തി അതിരാവിലെ വെറും വയറ്റിൽ കുടിക്കുക.
തേൻ ചൂടാക്കിയോ,ചൂടുള്ള കാലാവസ്ഥയിലോ,ശരീരം ചൂട് പിടിച്ചിരിക്കുമ്പോഴോ,ചൂടുള്ള എന്തിന്റെയെങ്കിലും കൂടെയോ ഉപയോഗിക്കുന്നത് നല്ലതല്ല. എന്നാൽ ചില രോഗാവസ്ഥകളിൽ മരുന്നായി ഉപയോഗിക്കാവുന്നതാണ്. ആഹാരമായി ഉപയോഗിക്കുമ്പോഴാണ് മേൽപ്പറഞ്ഞ കാര്യങ്ങൾ ശ്രദ്ധിക്കേണ്ടത്.
ചൂടാറിയ റൊട്ടിയിലോ ചപ്പാത്തിയിലോ തേൻ പുരട്ടി നൽകുന്നത് കുട്ടികളിലെ വിരശല്യം ഒഴിവാക്കാൻ നല്ലത്.
ചെറുചൂട് വെള്ളത്തിൽ തേൻ ചേർത്ത് വെറും വയറ്റിൽ അതിരാവിലെ കുടിച്ചാൽ വണ്ണം കുറയും.
വണ്ണം വയ്ക്കുവാൻ പച്ചവെള്ളത്തിൽ തേൻ ചേർത്ത് രാവിലെയും വൈകിട്ടും കുടിക്കാം.
ജലദോഷം കുറയ്ക്കുവാൻ തേനിൽ ചെറുനാരങ്ങയുടെ നീര് ചേർത്ത് കുടിക്കുക.
കിടക്കാൻ നേരം തേൻ കഴിച്ചാൽ നല്ല ഉറക്കം ലഭിക്കും.
നിയന്ത്രണത്തിലുള്ള പ്രമേഹത്തിന് മഞ്ഞളും നെല്ലിക്കയും പൊടിച്ചോ, അരച്ചോ ചേർത്ത് തേൻ കൂട്ടിക്കഴിക്കാം.
ഗർഭിണികൾക്ക് ഒരു ടീ സ്പൂൺ തേൻ വീതം ദിവസവും കഴിക്കാം.
രക്തക്കുറവിന് രണ്ടുനേരവും ഒരു ടീ സ്പൂൺ വീതം തേൻ കുടിക്കണം.
ശരീരം തണുപ്പിക്കുന്നതിന് ഒരു ഗ്ലാസ് കാരറ്റ് ജ്യൂസ് തേൻ ചേർത്ത് കുടിക്കാം.
ക്ഷീണമുള്ളവർക്ക് ഒരു ഗ്ലാസ് പശുവിൻപാൽ കാച്ചി തണുപ്പിച്ച് മധുരം തോന്നുന്ന അത്രയും അളവിൽ തേൻ ചേർത്ത് പതിവായി കഴിക്കുക.
പനിയുള്ളപ്പോൾ തേൻ ചേർത്ത് ഇടയ്ക്കിടെ വെള്ളം കുടിക്കുകയും മറ്റ് ആഹാരം ഒഴിവാക്കുകയും ചെയ്യുക.
കാഞ്ഞിര മരത്തിലെ തേൻ സൂപ്പർ!
കാഞ്ഞിരമരത്തിൽ കൂടുകൂട്ടുന്ന ഏറ്റവും ചെറിയ തേനീച്ചകൾ സംഭരിക്കുന്ന തേനാണ് ഏറ്റവും നല്ലതെന്ന് ആയുർവേദഗ്രന്ഥങ്ങളിൽ പറയുന്നു. തേനീച്ചകളുടെ നിറവും വലുപ്പവും സ്വഭാവവും അനുസരിച്ച് തേനുകൾ എട്ടുതരമെന്നും വിവരിക്കുന്നുണ്ട്. അവ ഓരോന്നും പ്രത്യേക ഗുണങ്ങളുള്ളവയാണ്. അവയുടെ ഫലപ്രാപ്തിയും അപ്രകാരം തന്നെ.
റബർ, കശുമാവിൻ തോട്ടങ്ങളിൽ ഉൽപ്പാദനം നടത്തുന്ന തേൻ, പെരുന്തേൻ അഥവാ വൻതേൻ എന്നാണ് അറിയപ്പെടുന്നത്. കശുമാവിൻ തോട്ടത്തിൽ നിന്ന് ലഭിക്കുന്ന തേൻ, റബർ തോട്ടത്തിൽ നിന്ന് ലഭിക്കുന്നതിനേക്കാൾ ഗുണകരമാണ്.
ചെറു തേനീച്ചകളാൽ വിവിധങ്ങളായ ചെറിയ പുഷ്പങ്ങളിൽ നിന്ന് ശേഖരിക്കുന്നതാണ് ചെറുതേൻ. അവയുടെ ഔഷധഗുണം പെരുന്തേനിനെക്കാൾ കൂടുതലാണ്. തേൻ കൂടാതെ തേനീച്ചയുടെ കൂടും പൊൺമെഴുക് എന്ന പേരിൽ ആയുർവേദ ഔഷധ നിർമ്മാണത്തിന് ഉപയോഗിക്കുന്നു.