കിളിമാനൂർ: ഭർത്താവിനെയും ആറ് വയസുള്ള മകളെയും ഉപേക്ഷിച്ച് ഒളിച്ചോടിയ യുവതിയും കാമുകനും അറസ്റ്റിലായി. കിളിമാനൂർ മലയാമഠം കടമ്പാട്ടുകോണം പുത്തൻവീട്ടിൽ ആതിര (25), തളിപ്പറമ്പ്, മൂന്നാംകുന്ന്, രയറാം വെങ്കിട്ടക്കൽ ഹൗസിൽ സ്റ്റാനസ് (26) എന്നിവരാണ് പിടിയിലായത്. മൊബൈൽ ഫോണിലൂടെ പരിചയപ്പെട്ട യുവാവുമായി പ്രണയത്തിലാവുകയും കാമുകന്റെ പ്രേരണയിൽ കഴിഞ്ഞ 25 ന് രാത്രി 9.30 ന് മകളെ ഉപേക്ഷിച്ച് ഒളിച്ചോടുകയുമായിരുന്നു. ഓട്ടോ ഡ്രൈവറായ യുവതിയുടെ ഭർത്താവ് നൽകിയ പരാതിയുടെ അടിസ്ഥാനത്തിൽ കിളിമാനൂർ പൊലീസ് നടത്തിയ അന്വേഷണത്തിലാണ് ഇരുവരേയും കണ്ണൂരിൽ നിന്നു പിടികൂടിയത്. ആറു വയസുള്ള മകളെ ഉപേക്ഷിച്ച് പോയതിന് ശിശുസംരക്ഷണ നിയമപ്രകാരം ഇരുവർക്കുമെതിരെ കേസെടുത്ത് കോടതിയിൽ ഹാജരാക്കി. ആറ്റിങ്ങൽ ഡിവൈ.എസ്.പി എസ്.വൈ. സുരേഷിന്റെ നിർദ്ദേശാനുസരണം ഐ.എസ്.എച്ച്.ഒ കെ.ബി മനോജ്കുമാറിന്റെ നേതൃത്വത്തിൽ എസ്.ഐമാരായ പ്രദീപ്,സവാദ് ഖാൻ,ഷാജി,സി.പി.ഒ സജിത്ത്, ഷംല എന്നിവരടങ്ങിയ സംഘമാണ് പ്രതികളെ അറസ്റ്റ് ചെയ്തത്.