പിലിക്കോട്: തൃക്കരിപ്പൂർ, ചെറുവത്തൂർ, പടന്ന, പിലിക്കോട് പഞ്ചായത്തുകളിലെ കായിക പുരോഗതി ലക്ഷ്യമിട്ട് കാലിക്കടവ് മിനി സ്റ്റേഡിയം നിർമ്മിക്കുന്നു. മന്ത്രി ഇ.പി. ജയരാജൻ ഓൺലൈനിലൂടെ പ്രവർത്തി ഉദ്ഘാടനം ചെയ്തു. എം രാജഗോപാലൻ എം.എൽ.എ. അദ്ധ്യക്ഷത വഹിച്ചു. കാസർകോട് വികസന പാക്കേജിൽ ഉൾപ്പെടുത്തി രണ്ടു കോടി രൂപയും ഗ്രാമപഞ്ചായത്ത് വിഹിതമായ 35 ലക്ഷം രൂപയും ചേർത്താണ് നിർമ്മാണം. കാസർകോട് വികസന പാക്കേജ് സ്‌പെഷ്യൽ ഓഫീസർ ഇ.പി. രാജ്‌മോഹൻ പദ്ധതി റിപ്പോർട്ട് അവതരിപ്പിച്ചു. ജില്ലാ കളക്ടർ ഡി. സജിത് ബാബു മുഖ്യാതിഥിയായി. ജില്ലാ പഞ്ചായത്ത് മെമ്പർ പി.വി. പത്മജ, ബ്ലോക്ക് പഞ്ചായത്ത് മെമ്പർ കൃഷ്ണൻ, ഗ്രാമപഞ്ചായത്ത് അംഗം പി. രാജീവൻ, സംസ്ഥാന സ്‌പോർട്‌സ് കൗൺസിൽ എക്‌സിക്യൂട്ടീവ് അംഗം ടി.വി ബാലൻ, വികസന പാക്കേജ് അസിസ്റ്റന്റ് എക്‌സിക്യൂട്ടീവ് എൻജിനീയർ കെ.എസ് ശശിധരൻ എന്നിവർ സംസാരിച്ചു.